ცვლილებები, რასაც ჭარბი სიფრთხილითაც კი ვხვდებოდით, აბსოლუტურად მშვიდად მიმდინარეობს, - ამის შესახებ საქართველოს ჯანდაცვის მინისტრმა დავით სერგეენკომ დღეს გამართულ პრესკონფერენციაზე განაცხადა. "ჩვენ საათობრივ მონიტორინგს ვახორციელებთ სამედიცინო დაწესებულებებში და აფთიაქებში. ამ დროის მდგომარეობით ახალ რეგულაციებზე გადასვლა მიმდინარეობს მშვიდად. არც პოლიკლინიკებში, არც აფთიაქებში არ შეიმჩნევა რაიმე განსაკუთრებული პაციენტთა ნაკადი ან შეფერხებები, მიუხედავად იმისა, რომ ორშაბათია და უკვე სამუშაო თვე იწყება. 37 პოლიკლინიკის მონაცემები გვაქვს ამ წუთისთვის. არსად აღინიშნება პაციენტებისთვის რაიმე დამატებითი ბარიერების შექმნა. ასე რომ, ეს ცვლილებები, რასაც, შეიძლება ითქვას, ჭარბი სიფრთხილითაც კი ვხვდებოდით, მიმდინარეობს აბსოლუტურად მშვიდად, გეგმაზომიერად და ვფიქრობ, ასეც გაგრძელდება", - განაცხადა დავით სერგეენკომ. დღეიდან მეორე ჯგუფის მედიკამენტები რეცეპტის გარეშე არ გაიცემა.