ახალი ამბები
თხილის შეწამვლის შედეგებით კმაყოფილი და უკმაყოფილო მოსახლეობა
ზუგდიდის მუნიციპალიტეტის სოფლებში მცხოვრები ფერმერები, რომლებმაც საკუთარ თხილნარში აგროღონისძიებები რამდენჯერმე გაატარეს, მიღებული შედეგით ნაწილი კმაყოფილია, მნიშვნელოვანი ნაწილი კი უხარისხო მოსავალზე საუბრობს. გლეხებმა, რომლებმაც კომპლექსური წამლობა საერთოდ ვერ ჩაატარეს მოსავლის თითქმის 80% გაუფუჭდათ. როგორც ფერმერები, ასევე აგრონომები ამის ძირითად მიზეზად აზიურ ფაროსანას ასახელებენ.

სოფელ კახათის მკვიდრმა ელგუჯა ჭედიამ, რომელსაც თხილის ფართობი  5 ჰექტარზე აქვს გაშენებული, კომპლექსური წამლობა 7-ჯერ ჩაატარა, თუმცა მოსავლის ხარისხით უკმაყოფილოა. მისი თქმით, პრეპარატები სპეციალისტების რეკომენდაციით შეისყიდა და წამლობაც მათი მითითებების მიხედვით განახორციელა. მიუხედავად ამისა ამბობს, რომ წლევანდელი მოსავალიც გაუფუჭდა. ის დარწმუნებულია, რომ თხილის გულის დაზიანება აზიურმა ფაროსანამ გამოიწვია.

„თხილნარი გადახურული ხომ არ მაქვს ფაროსანა, რომ  არ შემოვიდეს. შევწამლავ ცოტა ხანი არ არიან, მერე კვლავ ჩნდებიან, სხვა ფართობებიდან გადმოდიან. ეს ხოჭო უნდა მოისპოს, არანაირი სხვა დაავადება ასე არ მოქმედებს თხილის ხარისხზე“, - გვითხრა მან.

ამავე სოფლის მკვიდრი გია იზორია ამბობს, რომ ფართობი 3-ჯერ შეწამლა, თუმცა მეზობლებმა მსგავსი აგროღონისძიებები ვერ გაატარეს და მავნებელმა მათი ნაკვეთებიდან მის თხილნარში გადაინაცვლეს.

„მე რომ შევწამლო, სამეზობლოში ამას ყველა ვერ ახერხებს. შეწამლვის შემდეგ ათ დღეში ისევ ჩნდება და მაგის საშუალება არ გვაქვს, რომ ყოველ ათ დღეში შეგვეწამლა. ახლა რომ შევხედავ თითქოს 50% კარგია მაგრამ ერთ კვირაში გულს რაღაც ემართება და ფუჭდება. იყო წლები, რომ სამ ტონამდე იყო შემოსავალი, გასულ წელს შვიდას კილომდე ძლივს შევაგროვე, წელს რა იქნება არ ვიცი... სოფელში ერთმანეთს, როგორც შეგვიძლია ისე ვეხმარებით, მთავრობამაც შეწამლა, მაგრამ სასურველი შედეგი მაინც არ გვაქვს ჯერ. ძალიან რთული ყოფილა ეს მწერი“, - თქვა იზორიამ.

სოფელ ჯიხაშკარის მკვიდრი დოდო ჯიშკარიანი ამბობს, რომ უსახსრობის გამო საკუთარი ნაკვეთი ვერ შეწამლა, რის გამოც მოსავალი სრულიად გაუფუჭდა.

„ორი წელია არ გვაქვს შემოსავალი, საერთოდ არ შევაგროვებ. რა აზრი აქვს, რომ მოკრიფო, სადაც 1 ტონა გვქონდა 200  კილოც არ იქნება და ისიც მთლიანად გაფუჭებული იყო. წელს არ გვაქვს გადაწყვეტილება მიღებული მოვკრეფთ თუ არა, ცოტა ხანი გადავხედავ,  თუ 10-დან 3-4 არ იქნება კარგი, აღარ დავკრეფთ, ხარჯებს ვერ დაფარავს“, - თქვა ჯიშკარიანმა.

დარჩელის მკვიდრი მარიკა კოდუა, რომელიც 100 ჰა-მდე თხილის პლანტაციას ფლობს ამბობს, რომ კომპლექსური წამლობა 7-ჯერ ჩაატარა და მოსავალიც შესაბამისად ხარისხიანი, თუმცა აქვე ამბობს, რომ დანაკლისი მასაც აქვს .

„ასე ვთქვათ, ორ მხარეს მაქვს პლანტაცია. იმ ნაწილს, რომელსაც მეზობლების თხილნარები და სხვა ნარგავები ესაზღვრება და წამლობა არ ჩაატარეს, შედარებით ცუდი მოსავალია. სულ მცირე 20% უარგისია. იმ მხარეს კი, სადაც დაცულია და მხოლოდ ჩემი ნაკვეთია იდეალური შედეგი მაქვს, წამლობამ 100%-იანი შედეგი გამოიღო", - ამბობს კოდუა.

ფერმერი მოსავლის დაზიანებას აზიურ ფაროსანას უკავშირებს და ამბობს, რომ სოკოვანი დაავადება მავნებლის ნაკბენში ვითარდება.

„სოკო არის შედეგი, გამომწვევი მიზეზი არის ფაროსანა“, - თქვა ახალგაზრდა ფერმერმა.

ხარისხის გაუმჯობესებაზე საუბრობენ, თხილის ჩამბარებელი პუნქტებში მომუშავეთა ნაწილი. მათი ინფორმაციით, შარშან ამ დროს თხილი მასიურად გაფუჭებული იყო, წელს კი უკეთესი მდგომარეობაა. არველოდ ლიპარტია, რომელიც 25 წელია თხილის ჩამბარებელ პუნქტში მუშაობს, გვეუბნება, რომ შარშანდელთან შედარებით წელის მოსავლის ხარისხი ოდნავ გაუმჯობესებულია.

„წელს ვინც ამბობს, რომ შეწამლა, მათი თხილი 10-დან 7-8 კარგია. ვინც საერთოდ არ მოუარა მათი მოსავლი თითქმის გაფუჭდა, 10-დან 3-4 კარგი ძლივს გამოდის“, - ამბობს ის.

თხილის ჩამბარებელ პუნქტებში გვეუბნებიან, რომ ამ ეტაპზე თხილის ფასი ხარისხის მიხედვით, 50 თეთრიდან  2 ლარამდე მერყეობს, შარშან კი ამ დროს მისი ფასი 20-50 თეთრი იყო.

„წინასწარ ვერ განვსაზღვრავთ, რა ფასი იქნება ხვალ. ჩვენ დამოკიდებული ვართ თხილის გადამამუშავებელ ქარხნებზე. ვფიქრობთ, რომ წელს ექნება ფასი“, - ამბობენ ისინი.

აგრონომი დემეტრე ლიპარტია ამბობს, რომ აგროღონისძიებების გატარებამ შედეგი გამოიღო და მოსვლის ხარისხი შარშანდელთან შედარებით მნიშვნელოვნად გაუმჯობესდა. მისივე თქმით, წელს თხილის გულის დაზიანება, ძირითადად, ფაროსანამ გამოიწვია. მისი განმარტებით, კვერცხებიდან გამოსული ნიმფები, რამდენიმე დღეში ზრდასრულ ფაროსანებად იქცევიან და მათი შეწამვლა აუცილებელია. ლიპარტიას მტკიცებით, მათ შეუძლიათ უკვე ძირს დაყრილი მწიფე თხილისა და სიმინდის მოსავლის გაფუჭებაც.

„ვინც ხუთჯერ  მაინც ჩაატარა წამლობა აქვს იდეალური შედეგი. სოკოვანი დაავადების მიერ თხილის დაზიანება საერთოდ არ შეიმჩნევა, მაგრამ იმათ ვისაც არ შეწამლავთ,  ან 1-2-ჯერ შეწამლეს, ცუდი შედეგი აქვთ.  უნდა მოხდეს, გეგმაზომიერ წამლობა, რაც ფერმერს ჰექტარზე გაანგარიშებით 700 დან 1000 ლარამდე უჯდება”, - ამბობს აგრონომი.

თხილის გადამამუშავებელთა და ექსპორტიორთა ასოციაციის წევრი და კომპანიების Nutex/Nutsge-ის დამფუძნებელი მამუკა ბერიაშვილი, ამ ბიზნესით დაკავებული სხვა ადამიანების მსგავსად ამბობს, რომ მოსავლის ხარისხი შარშანდელთან შედარებით გაუმჯობესებულია. მისი თქმით,  ისინი ხარისხს თურქული და ევროპული სტანდარტების მიხედვით ამოწმებენ და არა ისე, როგორც ამას თხილის ჩამბარებელ პუნქტებში აკეთებენ.

„რამდენია კარგი და რამდენია ცუდი ამის მიხედვით არ ვამოწმებთ ჩვენ. კრიტერიუმები სხვადასხვა გვარია, მაგალითად, როგორია მისი ტენიანობა, ფარული სიდამპლე, გამოსავლიანობა, სიდამწვრე და ა.შ. ამ ეტაპზე საუკეთესო თხილის ფასი 2 ლარია“, - ამბობს ბერიაშვილი.

რაც შეეხება ფასს, ერთ-ერთი მსხვილი იმპორტიორი ამბობს, რომ თხილის ფასს მსოფლიო ბაზარი განსაზღვრავს და ამ ეტაპზე უჭირს იმის თქმა თუ რა იქნება მისი საბოლოო ღირებულება. 

სურსათის ეროვნული სააგენტოს ინფორმაციით, მავნებლის პოპულაცია შარშანდელთან შედარებით შემცირებულია და ფერმერებს მოუწოდებენ რომ, მაქსიმალური შედეგის მისაღწევად აქტიურად ჩაერთონ მავნებლის წინააღმდეგ ბრძოლის პროცესში.

მათივე ცნობით, დღეის მონაცემებით, დასავლეთ საქართველოში თერმული ნისლის ტექნოლოგიით 310 ათასზე მეტი ჰექტარი, სატრაქტორე აგრეგატით - 10 ათასამდე ჰექტარი საყანე ფართობი, ხოლო   „მოიზიდე და გაანადგურე“ სადგურების გამოყენებით (ცივი შესხურებით) –  18 ათასზე მეტი ჰექტარი დამუშავებულია.




Print Email
FaceBook Twitter
ამავე კატეგორიაში
დღის სიახლეები
21 / აგვისტო 2019
„ვისოლ ჯგუფს“, რომელსაც ზუგდიდში საერთაშორისო ბრენდის მქონე სავაჭრო ობიექტის მშენებლობა 2017 წლის ზაფხულში უნდა დაესრულებინა, ხელშეკრულების ვადა კიდევ ორი წლით გაუხანგრძლივდა.
21 / აგვისტო 2019
აშშ-ს სახელმწიფო დეპარტამენტის ყოფილმა მაღალჩინოსანმა მეთიუ ბრაიზამ IWPR-თან (ომის და მშვიდობის გაშუქების ინსტიტუტი) ინტერვიუში განაცხადა, რომ ანაკლიის პორტს საქართველოსთვის გარდამტეხი მნიშვნელობა აქვს.
21 / აგვისტო 2019
ზუგდიდის მუნიციპალიტეტის მერია და საკრებულო, ახალი ხელშეკრულებების თანახმად, „საქართველოს ბანკის“ მომხმარებელი გახდა.
საზოგადოება
{{ARTICLEIMAGE}}ანაკლიასა და განმუხურში მუსიკალურ ფესტივალ ECHOWAVES 2019-ის მოსამზადებელი სამუშაოები მიმდინარეობს.
რუსეთ-საქართველოს 2008 წლის ომიდან 11 წელი გავიდა. აგვისტოს ხუთ დღიან ომს 400-ზე მეტი ადამიანის სიცოცხლე ემსხვერპლა, მათ შორის იყო 170 სამხედრო პირი, შს სამინისტროს 19 თანამშრომელი და 244 სამოქალაქო პირი.
ივლისში საქართველოს 1,099,474 საერთაშორისო ვიზიტორი ესტუმრა, რაც გასული წლის მაჩვენებელს 5.8%-ით აღემატება. ამის შესახებ ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა ტურიზმის მე-2 კვარტლის სტატისტიკის შეჯამების და ივლისის მონაცემებზე საუბრისას განაცხადა.
მთავარი საინფორმაციო გამოშვება
ჩვენი თვითმმართველობა
არქივი
ამინდი
ზუგდიდი 29 °C
img
სოხუმი 30 °C
img
ფოთი 27 °C
img
მესტია 23 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ ”ღია საზოგადოება-საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.
The views, opinions and statements expressed by the authors and those providing comments are theirs only and do not necessarily reflect the position of Open Society Georgia Foundation. Therefore, the Open Society Georgia Foundation is not responsible for the content of the information material.