საქართველოს ვიცე-პრემიერმა და საგარეო საქმეთა მინისტრმა მიხეილ ჯანელიძემ ნიუ-იორკში გაერო-ს უშიშროების საბჭოს დებატებში მიიღო მონაწილეობა, რომლის ფარგლებშიც სამხედრო კონფლიქტის დროს მშვიდობიანი მოსახლეობის დაცვის საკითხები განიხილეს. ინფორმაციას საგარეო საქმეთა სამინისტრო ავრცელებს.
უწყების ცნობით, ჯანელიძემ ყურადღება გაამახვილა საქართველოს ოკუპირებულ რეგიონებში არსებულ ვითარებაზე და ადგილზე ადამიანის უფლებების დარღვევის მძიმე ფაქტებზე.

„რუსეთი აგრძელებს გაერო-ს ქარტიის და საერთაშორისო სამართლის ძირითადი პრინციპების, ისევე როგორც გაერო-ს უშიშროების საბჭოს (UNSC) 39 რეზოლუციის დარღვევას. რუსეთ-საქართველოს ომის შემდეგ 10 წელი გავიდა და რუსეთის ფედერაციას ჯერ კიდევ შესასრულებელი აქვს ევროკავშირის მედიაციით 2008 წლის 12 აგვისტოს ცეცხლის შეწყვეტის შესახებ შეთანხმებით ნაკისრი ვალდებულებები. ევროკავშირის სადამკვირვებლო მისია (EUMM), ერთადერთი წარმოდგენილი საერთაშორისო მექანიზმი, ვერ ახერხებს საკუთარი მანდატის სრულყოფილად განხორციელებას, რადგან რუსეთის ფედერაციის უკანონო სამხედრო ოკუპაციის ქვეშ მყოფ ტერიტორიებზე შესვლის შესაძლებლობა არ ეძლევა. შეთანხმების მე-5 პუნქტის თანახმად, რუსეთის ფედერაციამ უნდა გაიყვანოს თავისი ჯარები და დაუშვას ადგილზე საერთაშორისო უსაფრთხოების მექანიზმების არსებობის შესაძლებლობა“ - აღნიშნა მინისტრმა.

გარდა ამისა, საგარეო უწყების ხელმძღვანელმა რუსეთის ფედერაციის მიერ ოკუპირებულ ტერიტორიებზე საერთაშორისო უსაფრთხოების მექანიზმების არდაშვებაზე ისაუბრა და დასძინა, რომ ეს საფრთხეს უქმნის ადამიანების სიცოცხლეს და მათი ძირითადი უფლებების დაცვას. ამ კონტექსტში ვიცე-პრემიერმა ყურადღება საქართველოს მოქალაქეების გიგა ოთხოზორიასა და არჩილ ტატუნაშვილის მკვლელობის საკითხებზე გაამახვილა.

როგორც საქართველოს საგარეო უწყების ხელმძღვანელმა აღნიშნა, საქართველოს ოკუპირებულ ტერიტორიებზე მცხოვრები მოსახლეობა მოკლებულია უსაფრთხოების მინიმალურ გარანტიებს, ირღვევა მათი ფუნდამენტური უფლებები და თავისუფლება, მათ შორის, შეზღუდულია თავისუფლად გადაადგილება, განათლების მიღება მშობლიურ ენაზე და ირღვევა საკუთრების უფლებები.

საგარეო საქმეთა მინისტრის შეფასებით, საქართველოში, გაერო-ს სადამკვირვებლო მისიის (UNOMIG) მანდატის გაგრძელებაზე 2009 წლის ვეტოს შემდგომ ოკუპირებულ რეგიონებში შეიქმნა ვაკუუმი და საერთაშორისო უსაფრთხოების მექანიზმების ჩამოყალიბების აუცილებლობა, რაც პირდაპირ გავლენას ახდენს სამოქალაქო პირების დაცვაზე.

ღია დებატები თემაზე "სამხედრო კონფლიქტის დროს მშვიდობიანი მოსახლეობის დაცვის საკითხები" პოლონეთის თავმჯდომარეობის ინიციატივით გაიმართა.