აფხაზეთში დაკავებული არასრულწლოვანი ქართველების ადგილსამყოფელი უცნობია
03:27 / 29.12.2015
ხურჩა-ნაბაკევის ადმინისტრაციულ საზღვართან ე.წ. "საზღვრის
გადაკვეთის" ბრალდებით 19 საქართველოს მოქალაქე
დააკავეს, რომელთა შორის 2 არასრულწლოვანია.
აფხაზეთის ლეგიტიმური მთავრობის სამეგრელოს წარმომადგენლობის
ხელმძღვანელ ალექსანდრე ჩიკვაიძის ინფორმაციით, დაკავებულები
ნაბაკევში მდებარე რუსულ სამხედრო ბაზაზე გადაიყვანეს, რის შემდეგაც 8
მოქალაქე, რომელთაც ე.წ. "აფხაზური პასპორტები" აღმოაჩნდა, ჯარიმის
სანაცვლოდ გაათავისუფლეს, 6 მათგანი კი, რომელთა შორის 2
არასრულწლოვანიცაა, პატიმრობაში დატოვეს, თუმცა ჩიკვაიძის თქმით, მათი
ზუსტი ადგილსამყოფელი ამ დრომდე უცნობია.
რაც შეეხება დანარჩენ 5 მოქალაქეს, ასევე უცნობია, რა ბედი ეწიათ მათ
და სად იმყოფებიან.
"ვიცით მხოლოდ იმ 6 პირის ვინაობა, რომელთა შორის არიან ბავშვებიც.
ჩვენ ყველა საერთაშორისო ორგანიზაცია, ასევე შესაბამისი უწყებები
საქმის კურსში ჩავაყენეთ, რათა ამ ფაქტს რეაგირება მოჰყვეს", -
აღნიშნა ჩიკვაიძემ რადიო "ათინათთან" საუბრისას.
მასალის გამოყენების პირობები