სამეგრელო-ზემო სვანეთის მუნიციპალიტეტებში გზების გაწმენდითი სამუშაოები მიმდინარეობს. სამხარეო ადმინისტრაციის პრესსამსახურის ცნობით, სპეცტექნიკა გზების გაწმენდით სამუშაოებს მთელი ღამის განმავლობაში გააგრძელებს. მათივე განმარტებით, თოვის შეწყვეტისთანავე მოხდება ტექნიკური მარილის დაყრა. მიმდინარე სამუშაოები სამეგრელო-ზემო სვანეთის ვიცე - გუბერნატორმა კობა ქანთარიამ დაათვალიერა.

დიდთოვლობის გამო ზუგდიდი - ჯვარი - მესტია - ლასდილის საავტომობილო გზის ჯვარი - ხაიშის (კმ30-კმ70) მონაკვეთზე ამ დრომდე აკრძალულია ყველა სახის ავტოტრანსპორტის მოძრაობა.

რადიო „ათინათი“ სამეგრელო-ზემო სვანეთის გუბერნიის პრესსამსახურის მიერ გავრცელებულ ინფორმაციას უცვლელად გთავაზობთ:

„4 იანვრის 22 საათის მდგომარეობით სამეგრელო-ზემო სვანეთის რეგიონის მასშტაბით ელექტროენერგია არ მიეწოდება 2600-მდე აბონენტს. აქედან სენაკში 800 აბონენტი გამორთულია უსაფრთხოების მიზნით. დღის განმავლობაში დაზიანებული აბონენტების უმეტესობას ელექტროენერგიის მომარაგება აღუდგა, თუმცა ინტენსიური თოვის გამო გაჩნდა დაზიანების ახალი კერები, უმეტესწილად - მარტვილში, სენაკსა და აბაშაში. „ენერგო-პრო ჯორჯიას“ მიერ მობილიზებულია დამატებითი სარემონტო ბრიგადები ქვეყნის სხვადასხვა რეგიონებიდან. მთელი ღამის განმავლობაში იმუშავებენ ღამის მორიგე ჯგუფები. დილიდან კი პრობლემურ ადგილებზე გავლენ, როგორც ადგილობრივი, ისე დამატებითი სარემონტო ჯგუფები, რომლებიც აქტიურად გააგრძელებენ აღდგენით სამუშაოებს. სტიქიის დაწყების დღეს რეგიონში ელექტროენერგია არ მიეწოდებოდა 10 ათასზე მეტ აბონენტს.

რეგიონში გაზმომარაგება ხდება სტაბილურად. ზუგდიდში გამორთული 5 კორპუსიდან გაზის მიწოდება აღუდგა 4 საცხოვრებელ კორპუსს. დარჩენილ ერთ კორპუსში მიმდინარეობს სამუშაოები და გაზმომარაგების ჩართვა ამაღამვე მოხდება.

სამეგრელო-ზემო სვანეთის სამხარეო ადმინისტრაციაში გუბერნატორის დავალებით შექმნილია საგანგებო შტაბი, რომელიც 24 საათიან რეჟიმში მუშაობს. შტაბს კოორდინაცია აქვს, როგორც მუნიციპალურ შტაბებთან ,ასევე ენერგო-პრო ჯორჯიას და სოკარ გაზის შტაბებთან. სამხარეო ადმინისტრაციაში მოქმედებს რეგიონალური ცხელი ხაზი.

სამხარეო ადმინისტრაციასთან ერთად რეგიონის ყველა მუნიციპალიტეტში შექმნილია საგანგებო შტაბები, რომლებიც ამჟამადაც აქტიურად მოქმედებენ, მობილიზებულია სპეცტექნიკა, მიმდინარეობს გაწმენდითი სამუშაოები. გამართულად მუშაობს ყველა სასიცოცხლო ობიექტი“, - აღნიშნულია სამხარეო ადმინისტრაციის პრესსამსახურის მიერ გავრცელებულ ინფორმაციაში.