დღეს ზუგდიდში დამოუკიდებლობის აღდგენის 26-ე წლისთავი სხვადასხვა ღონისძიებით აღნიშნეს. ქალაქის ცენტრალურ მოედანზე, ბულვარსა და მის მიმდებარზე ტერიტორიაზე ღონისძიებები დილის ათი საათიდან დაიწყო.



დილიდან მთელი დღის განმავლობაში გამოფენილი იყო სამხედრო ტექნიკა.



ადგილობრივი ხელისუფლების წარმომადგენლებმა გვირგვინებით შეამკეს ზვიად გამსახურდიას, მერაბ კოსტავას, ილია ჭავჭავაძისა და სპირიდონ კედიას ბიუსტები. მათ ზუგდიდელებსა და სრულიად საქართველოს დამოუკიდებლობის დღე მიულოცეს.



დღევანდელ ღონისძიებებში მონაწილეობა მიიღო ჯანდაცვის სამინისტრომ. დამოუკიდებლობის დღე ზუგდიდიდან მიულოცა საქართველოს ჯანდაცვის მინისტრმა დავით სერგეენკომ. მობილურ ამბულატორიასა და კარავში საზოგადოებრივი ჯანმრთელობისა და დაავადებათა კონტროლის ცენტრის სპეციალისტები ადგილობრივებს ჩ ჰეპატიტის უფასო სკრინინგი ჩაუტარეს.



საკუთარი სივრცე მოაწყო გარემოს დაცვის სამინისტრომაც. ზუგდიდში იმყოფებოდა მინისტრის მოადგილე სოლომონ პავლიაშვილი. ადგილზე მისულ სტუმრების განწყობაზე ბენდმა UNDER 7-მა იზრუნა.



გარდა ადგილობრივი ბენდის კონცერტისა, ცენტრალურ მოედანზე მოსწავლე-ახალგაზრდობის სასახლის, კლასიკური მუსიკის, ხოლო ყოფილი კინოთეატრ "ატრიუმის" შენობის წინ ფოლკლორული ანსამბლების კონცერტი გაიმართა.



ცენტრალურ ბულვარში მთელი დღის განმავლობაში სხვადასხვა სპორტული ღონისძიება ჩატარდა, რომელშიც ზუგდიდელებმა მიიღეს მონაწილეობა.



ბულვარის მიმდებარე ტერიტორიაზე ასფალტი მოხატეს სკოლის მოსწავლეებმა.



დღესვე ქალაქის ცენტრალურ ნაწილში ველორბოლა გაიმართა, მოედანზე კი "ვეფხისტყაოსანი" საჯაროდ წაიკითხეს.



სამხატვრო სკოლის მოსწავლეთა მონაწილეობით კი პლენერი სახელწოდებით "ჩემი ვეფხისტყაოსანი" მოეწყო.



დღესვე ზუგდიდის არტ-გალერეაში მხატვარ ელენე ფიფიას ფერსონალური გამოფენა გაიხსნა.



დღეს მთელი დღის განმავლობაში გადაკეტილი იყო ქალაქის ცენტრალური ნაწილი. დამოუკიდებლობის დღის აღნიშვნას ზუგდიდელები საკუთარ ოჯახებთან ერთად შეუერთდნენ.



საზეიმო ღონისძიებები დღეს 21:00-სთ-ზე გალა კონცერტითი დასრულდება. წელს დამოუკიდებლობის დღისადმი მიძღვნილი ღონისძიებები შოთა რუსთაველის დაბადებიდან 850 წლის იუბილეს აღსანიშნავად, ლოზუნგით - ,,მე რუსთაველის ქვეყნიდან ვარ'' იმართება.

ამავე თემაზე:

"მე რუსთაველის ქვეყნიდან ვარ" - დამოუკიდებლობის დღე ზუგდიდში (ფოტორეპორტაჟი)

ელენე ფიფიას პერსონალური გამოფენა ზუგდიდში (ვიდეო)

ზუგდიდში დამოუკიდებლობის დღის აღნიშვნა ენგურის ხიდიდან დაიწყო

მესამე საჯარო სკოლის საქველმოქმედო ღონისძიება ცენტრალურ ბულვარში (ვიდეო)

გარემოს დაცვის სამინისტროს „რუსთაველის ქვეყანა“ ზუგდიდში (ვიდეო)

დავით სერგეენკომ ზუგდიდელებს 26 მაისი მიულოცა (ვიდეო)

ზუგდიდში კოსტავას, გამსახურდიას და ჭავჭავაძის ძეგლები ყვავილებით შეამკეს (ვიდეო)

დღეს საქართველოს დამოუკიდებლობის დღეა