როგავების ოჯახი სუს-ის მიერ მიწოდებულ ინფორმაციას არ ენდობა (ვიდეო)
15:50 / 31.05.2017
გალის რაიონიდან დაბრუნებულ სუს-ის წარმომადგენელს კახაბერ ქემოკლიძეს
ენგურის ხიდზე რიყეში დაკავებული
მამა-შვილ როგავების ოჯახის წევრი თინათინ როგავა დახვდა, რომელიც
მისგან ინფორმაციის მიღებას ითხოვდა. ქემოკლიძის ცნობით, შეხვედრაზე
ითქვა, რომ მამა-შვილი წინასწარ პატიმრობაში რჩება და მათი
ჯანმრთელობის მდგომარეობა სტაბილურია. გარდა ამისა, ქართული მხარე
აცხადებს, რომ როგავები უკანონოდ დააპატიმრეს და საქართველოს მთავრობა
მათ დროულად გასათავისუფლებლად ყველა ღონეს იხმარს.
როგავების ოჯახს სუს-ის ანალიტიკური სამსახურის თანამშრომლების მიერ
მოწოდებული ინფორმაციის არ სჯერა. თინათინ როგავამ ქემოკლიძეს ჰკითხა,
ნახა თუ არა პირადად დაკავებულები და აქვს თუ არა აღნიშნული
ინფორმაციის დამადასტურებელი რამე დოკუმენტი, რაზეც სუს-ის
წარმომადგენელმა უპასუხა, რომ შეხვედრა მსგავს ფორმატს არ
ითვალისწინებს.
ცნობისთვის, ზუგდიდის რაიონის სოფელს რიყეში რუსი ე.წ. მესაზღვრეების
მიერ დაკავებული მამა-შვილის არჩიკო და პაატა როგავების მიმართ დე
ფაქტო რესპუბლიკის საგამოძიებო სამსახურის განყოფილებამ სისხლის
სამართლის საქმე აღძრა. მათ ბრალი ორი მუხლით წაუყენეს: "საზღვრის
უკანონო გადაკვეთა და ხელისუფლების წარამოდგენლისთვის წინააღმდეგობის
გაწევა". საოკუპაციო ძალების წარმომადგენლებმა ენგურის მიმდებარე
ტერიტორიაზე არჩიკო და პაატა როგავები 5 აპრილს დააკავეს.
მასალის გამოყენების პირობები