ჰესების მშენებლობის საწინააღმდეგო აქცია მესტიაში დღეს ისევ განახლდა. ზემო სვანეთის მოსახლეობა კომპანია „სი ენერჯის“ ოფისთან შეიკრიბა. აქციის ერთ-ერთი მონაწილის მანანა საღლიანის თქმით, ისინი დღეს მესტიის შესასვლელში გზის გადაკეტვას აპირებდნენ, რათა მშენებელი კომპანიის კუთვნილი ტექნიკა არ გამოატარონ. თუმცა,  მათივე ინფორმაციით,  ჰესის მშენებარე კომპანიამ თოვლის გამო შესაბამისი ტექნიკის შეყვანა დღეს ვერ მოახერხა.

რაც შეეხება სპეცდანიშნულების რაზმს, რომელიც, არსებული ინფორმაციით, მესტიაშია მობილიზებული, აქციის მონაწილეები ამ ფაქტს მუნიციპალიტეტის მერს უკავშირებენ.

„ამით შიშის დათესვა უნდათ, თუმცა, ჩვენ არ შევშინდებით. სპეცდანიშნულების რაზმს ორი დღეა მთელი მესტია კონტროლზე ჰყავს აყვანილი. ჩვენ კრიმინალური არაფერი ჩაგვიდენია და რატომ გახდა, ამხელა დანაყოფების შემოყვანა საჭირო, ვერ ვხვდები. ყველაფერში დამნაშავე ადგილობრივი ხელისუფლებაა“, - თქვა საღლიანმა.

თავის მხრივ, მესტიის მერი კაპიტონ ჟორჟოლიანი ამბობს, რომ სპეცდანიშნულების რაზმის მობილიზების შესახებ ინფორმაციას არ ფლობს.

„მე ნამდვილად არ ვარ უფლებამოსილი, რომ სპეცდანიშნულების რაზმების შემოყვანის შესახებ ბრძანება გავცე. არც მინახავს ეს რაზმები, თუმცა, შემიძლია გითხრათ, რომ ინვესტიცია, რაზედაც არის საუბარია, აბსოლუტურად კანონიერია. ეს ჰესები რამე საფრთხეს რომ უქმნიდეს ჩვენს რეგიონს, პირველ რიგში ჩვენ ვიქნებოდით წინააღმდეგი. შემიძლია გითხრათ, რომ ეს პოლიტიკური აქციაა, სხვაგვარად ვერ ავხსნი იმას, რატომ არიან აქციაზე ისეთი ადამიანებით, ვინც თავის დროზე ჰესების მშენებლობას მხარს უჭერდა“, - აღნიშნა ჟორჟოლიანმა.

რაც შეეხება პროექტების გაცნობას, მერის თქმით, ნებისმიერ მსურველს მის განხილვაში მონაწილეობის მიღება შეეძლო.

სვანეთში ჰესებისა და სხვა საფრთხის შემცველი ინფრასტრუქტურული ობიექტების მშენებლობას მეორე დღეა აპროტესტებენ. აქციის მონაწილეები თვლიან, რომ დაუშვებელია რეგიონში ჰესების მშენებლობის დაწყება, სანამ პროექტს მოსახლეობა არ გაეცნობა.

ამავე თემაზე:

"არა ნენსკრაჰესს" - საპროტესტო აქცია მესტიაში