სამეგრელო-ზემო სვანეთის სამხარეო სამმართველოს ყოფილი თანამშრომელი გიორგი სამუშია, რომლის ექსტრადიცია უკრაინიდან საქართველოში გასულ თვეს განხორციელდა, თავისუფალია. ამის შესახებ რადიო "ათინათს" თავად სამუშიამ უთხრა. მისი თქმით, პატიმრობის ცხრათვიანი ვადა ამოიწურა და სწორედ ეს გახდა მისი გათავისუფლების საფუძველი.

„ამეკრძალა საზღვრის დატოვება, ჩამომართვეს პირადობის მოწმობა და პასპორტი. ჩვეულებრივ,ჩატარდება სასამართლო პროცესები და ვალდებული ვარ დავესწრო. საზღვრის გადაკვეთის გამო აღმოვჩნდი ციხეში, მოვიხადე სასჯელი და სწორედ ამ ვადის ამოწურვის გამო გამიშვეს. რადგანაც ქვეყანა დავტოვე, გირაო შემიცვალეს პატიმრობით, რაც უკვე მოვიხადე“, - ამბობს სამუშია.  

ყოფილი პოლიციელი უკრაინაში მიმდინარე წლის მაისში დააკავეს. მას უკრაინელი სამართალდამცავები გაყალბებული პასპორტით საზღვრის უკანონო გადაკვეთას ედავებოდნენ.

სამუშიას ბრალად ედება ორგანიზებული ჯგუფის მიერ ელბერდ კობერიძის თავისუფლების უკანონო აღკვეთაში მონაწილეობა. ყოფილი პოლიციელი თავს დამანაშავედ არ მიიჩნევს. მისივე განმარტებით, მას ამ საქმესთან არანაირი კავშირი არ აქვს.

პროკურატურაში აცხადებენ, რომ კობერიძის საქმეზე საქმის არსებითი განხილვა გრძელდება.

"გამომდინარე იქიდან, რომ პატიმრობის 9 თვიანი ვადა ამოიწურა, საქართველოს კონსტიტიციის თანახმად სასამართლომ მიიღო გადაწყვეტილება გიორგი სამუშიას აღკვეთი ღონისძიების შეცვლის თაობაზე (პატიმრობა შეიცვალა 3 ათასი ლარის ოდენობის გირაოთი), არსებითი განხილვა ელბერტ კობერძის წამების საქმეზე გრძელდება. აქვე მნიშვნელოვანია ერთი დეტალი, დაზარალებული ელბერტ კობერიძე ცხოვრობს ოკუპირებულ ტერიტორიაზე და მისი სასამართლოში გამოცხადება და გადაადგილება ვერ ხორციელდება გარკვეული შეზღუდვების გამო, თუმცა ბრალდების მხარე ცდილობს და ყველაფერს გააკეთებს იმისათვის რომ სასამართლოში წარმოადგინოს ყველა საჭირო მოწმის პოზიცია და მოახდინოს მათი დაკითხვა",- განაცხადეს უწყებაში.

ელბერდ კობერიძის თავისუფლების უკანონო აღკვეთისა და წამების ბრალდებით, ამავე საქმეზე, სისხლის სამართლის პასუხისგებაში მიცემულნი არიან დავით ახალაია, გიორგი კალანდაძე, მეგის ქარდავა და რომან შამათავა.

"2012 წლის 28 ივლისს, შს სამინისტროს სამეგრელო -ზემო სვანეთის სამხარეო სამმართველოს თანამშრომელმა გიორგი სამუშიამ, სხვა პირებთან ერთად, იმჟამინდელი მაღალი თანამდებობის პირების, დავით ახალაიას, გიორგი კალანდაძის,მეგის ქარდავას და რომან შამათავას დავალებით,ზუგდიდში უკანონოდ აღუკვეთა თავისუფლება ელბერდ კობერიძეს, ხელბორკილებით და სახეზე ნიღაბჩამოცმული გადაიყვანა თბილისში, სამხედრო პოლიციის დეპარტამენტის ადმინისტრაციულ შენობაში, სადაც ზემოთხსენებული ყოფილი მაღალჩინოსნების მიერ ერთობლივი განზრახვით დაგეგმილი იყო წამების გზით კობერიძისგან ტერორისტული აქტის მომზადების აღიარებითი ჩვენების მიღება. 
ამ მოთხოვნით, დავით ახალაიამ, გიორგი კალანდაძემ, მეგის ქარდავამ და რომან შამათავამ, სამხედრო პოლიციის შენობაში, რამდენიმე საათის განმავლობაში აწამეს და ცემეს ელბერდ კობერიძე. წამებისა დროს არაერთხელ დაასხურეს წიწაკის მხუთავი აირი და გაგუდვის ინსცენირების მიზნით თავზე ჩამოაცვეს პოლიეთილენის პარკი. ელბერდ კობერიძე იმდენად სასტიკად აწამეს, რომ მან გონება დაკარგა და უმწეო მდგომარეობაში, სასტიკად ნაწამები იმყოფებოდა 10 დღის განმავლობაში. მას სამედიცინო დახმარება აღმოუჩინეს მხოლოდ თავდაცვის სამინისტროში მომუშავე რიგითი თანამშრომლების თხოვნით, რის შემდეგაც ელბერდ კობერიძე გადაიყვანეს გორის სამხედრო ჰოსპიტალში, სადაც მოხერხდა მისი სიცოცხლის შენარჩუნება", - აცხადებდნენ მაშინ პროკურატურაში. 

საქმეზე გამოძიება სსკ-ის 143-ე მუხლის მე-2 ნაწილის "გ" ქვეპუნქტით, მე-4 ნაწილის "ა" ქვეპუნქტით და 1441-ე მუხლის მე-2 ნაწილის "ა" და "ბ", ასევე მე-3 ნაწილის "ბ" ქვეპუნქტებით მიმდინარეობდა, რაც 17 წლამდე ვადით თავისუფლების აღკვეთას ითვალისწინებს.

ამავე თემაზე:
გიორგი სამუშიას საქართველოში ექსტრადირება მოხდა