ზუგდიდში აუდიტის მიერ გამოქვეყნებულ ხარვეზებთან დაკავშირებით გამოძიება დაიწყო. ამის შესახებ რადიო „ათინათს“ პროკურატურაში უთხრეს. ამავე ცნობით, გამოძიება სახელმწიფო აუდიტის სამსახურის წერილისა და თანდართული მასალების საფუძველზე სამეგრელო - ზემო სვანეთის საოლქო პროკურატურამ მიმდინარე წლის 14 თებერვალს დაიწყო.

„ზუგდიდისა და მესტიის მუნიციპალიტეტების 2017-2018 წლების ბიუჯეტით გათვალისწინებული პროგრამების შემოწმების შედეგებთან დაკავშირებით, სახელმწიფო აუდიტის სამსახურის წერილისა და თანდართული მასალების საფუძველზე სამეგრელო - ზემო სვანეთის საოლქო პროკურატურის საგამოძიებო ნაწილში გამოძიება 2020 წლის 14 თებერვალს დაიწყო. კერძოდ, ორივე სისხლის სამართლის საქმეზე გამოძიება მიმდინარეობს 2017-2018 წლებში ბიუჯეტით გათვალისწინებული პროგრამების განხორციელებისას სამსახურებრივი უფლებამოსილების ბოროტად გამოყენების ფაქტზე, საქართველოს სისხლის სამართლის კოდექსის 332-ე მუხლის პირველი ნაწილით გათვალისწინებული დანაშაულის ნიშნებით“, - ამბობენ უწყებაში.

„ერთიანმა ნაციონალურმა მოძრაობამ" სამეგრელო-ზემო სვანეთის საოლქო პროკურატურაში განცხადება შეიტანა და ზუგდიდში სახელმწიფო აუდიტის დასკვნის თანახმად გამოვლენილ დარღვევებზე გამოძიების დაწყება მოითხოვა.

ამავე თემაზე:

აუდიტის სამსახური: ზუგდიდის მერიის მიერ უსახლკარო პირთა საცხოვრებელი ფართით უზრუნველყოფის პროგრამაში ხარვეზებია