სოციალური კამპანია #დარჩისახლში ფარგლებში და აჭარის ტელევიზიის გადაცემის "ეთნოფორის" თხოვნით, ანსამბლმა "კოლხური ტრიო" მეგრული სიმღერის "არამი დო შარიქას" ინტერპრეტაცია შემოგვთავაზა. "მეზობელი ქალები ერთმანეთში საუბრობენ. მათ კი ხელს უშლის ერთ-ერთის მთვრალი მეუღლე იასონი, რომელიც მხოლოდ ჭამის ჯავრშია და არყით გამოთრობა სურს. ქალები ბჭობენ და ხუმრობენ:
"გაიგეთ ხალხნო, თურმე კორონა მეგრელებს არ ერჩის.. არადა ის ტურასგასაგლეჯი რავა ყველგანაა, ამოუწყდა მომგონი, გამჩენი და ჯილაგი. დავუძახოთ ერთი, თენგიზს, ამირანს, მარინას და ლევან რატიანს საშველად, როგორმე მოგვაწოდონ წამალი. ამ ოხერი კორონასთვის სულ ერთია დიდი თუ პატარა. არ ხედავთ, რამოდენა ზარალშია იტალია ? თქვე გახარებულებო, რაც არ შეიძლება არ გააკეთოთ. წამოწექით სახლში და ამთქნარეთ რამდენიც გენებოთ. მოითმინეთ ცოტა, რომ იჯანმრთელოთ და გაექცეთ კორონას", - ასეთი შინაარსი ახლავს თან ვიდეოს აღწერას.

მომღერლები თავიანთ შემოქმედებაში კარანტინის თემასაც ეხებიან და ხუმრობენ, რომ საგანგებო რეჟიმის მიუხედავად, ყველა გარეთ დადის.

ფოლკლორული ანსამბლის წევრები ეკა კოღუა, ბელა ქამადაძე და დარეჯან ფაჩულია ამბობენ, რომ მათ ამ ვიდეოს გადაღებისას ბევრი იხალისეს. "კოლხური ტრიო", დაახლოებით, 45 წელია, რაც არსებობს.