კულტურული მემკვიდრეობის ეროვნული სააგენტოს ხელმძღვანელის ნიკა ვაჩეიშვილის განცხადებით, ბაგრატის ტაძარზე სარესტავრაციო სამუშაოები სრულიად საქართველოს კათოლიკოს-პატრიარქის თხოვნით შეჩერდა. როგორც ნიკა ვაჩეიშვილმა აღნიშნა, კიდევ ერთხელ უნდა აიწონ-დაიწონოს სარესტავრაციო სამუშაოები. „პატრიარქის გუშინდელმა ქადაგებამ შეგვაჩერებინა სარესტავრაციო სამუშაოები. მან თქვა, რომ კიდევ ერთხელ უნდა აიწონ-დაიწონოს ეს სამუშაოები. ჩვენ რა თქმა უნდა, მივყევით მის ნათქვამს. დღეს უკვე სამუშაოები შეჩერებულია. პროექტი, ჩვენი აზრით, ძალიან მაღალხარისხოვნად მიმდინარეობს. ამ პროცესის ფარგლებში შევხვდებით საპატრიარქოს წარმომადგენლებს, დაინტერესებულ მხარეს,“ - განაცხადა ვაჩეიშვილმა. მისივე თქმით, შესწავლის პროცესი არ დაახანებს. საპატრიარქოსთან შეთანხმებაც მოხდება და სარესტავრაციო სამუშაოებიც მალევე განახლდება. ნიკა ვაჩეიშვილის განმარტებით, სარესტავრაციო სამუშაოების შეჩერებას ამ ეტაპზე იუნესკოს მხრიდან უარყოფითი პოზიცია არ დაფიქსირებულა.