ახალი ამბები
"სოფლის მხარდაჭერის პროგრამის 73 პროექტიდან 23 შემთხვევაში ხარვეზები არსებობს"- ენმ-ს ბრალდებებს "ქართული ოცნება" პასუხობს
ზუგდიდში პარტია "ნაციონალური მოძრაობის" წევრებმა ბრიფინგი გამართეს. მათი თქმით, მუნიციპალიტეტის მასშტაბით, სოფლის მხარდაჭერის პროგრამის ფარგლებში, განხორციელებული 73 პროექტიდან 23 - ის შემთხვევაში არსებობს ხარვეზები და სისხლის სამართლის დანაშაულის რისკები.

საკრებულოს წევრის, დეპუტატ მაია კალანდიას თქმით,  არასრულფასოვნად შესრულებულ პროექტებს შორის არის სოფელ ორსანტიას ამბულატორიის ოთახების რეაბილიტაციის პროექტი, ახალსოფლის წყალმომარაგების ჩამრთველ - გამომრთველი სისტემის მოწყობა, სოფელ ნაცატუს ცენტრში სანიაღვრე არხის მოწყობა და ანაკლიაში მინი სტადიონის რეაბილიტაცია. კალანდიას მტკიცებით, ანაკლიაში ესართიას ქუჩაზე, ფეხბურთის მოედნის მიღება - ჩაბარების აქტი ორი თვით ადრე ისე გაფორმდა, რომ სამუშაოები დასრულებული არ იყო, რასაც ანაკლიის ყოფილი მაჟორიტარი, დათა შელია სოციალურ ქსელში გამოეხმაურა, მისი თქმით, "ნაციონალურ მოძრაობის" წევრი ცრუ ინფორმაციას ავრცელებს.

"2022 წელს ცენტრალური ხელისუფლებიდან სოფლის მხარდაჭერის პროგრამით მუნიციპალიტეტისთვის განსაზღვრული იყო 1 026 272 ლარი, ხოლო ადგილობრივმა ბიუჯეტმა დაუმატა 195 555 ლარი. ჩვენ წარმოვადგინეთ 73 პროექტი, სადაც ვფიქრობთ, რომ 50 ასე თუ ისე კარგად არის გაკეთებული და 23 შემთხვევაში არის ხარვეზები და შეიძლება იკვეთებოდეს სისხლის სამართლის დანაშაულები. ერთ-ერთი პროექტი არის ანაკლიაში, ესართიას ქუჩაზე მინი სტადიონის სარეაბილიტაციო სამუშაოები, რომელიც დაჯდა 40 000 ლარი. მიღება-ჩაბარების აქტი ორი თვის წინ იყო გაფორმებული. 4 აპრილს, როდესაც ჩვენ მივედით სტადიონზე, ფოტოები გადავიღეთ, შემდგომ შეეცადნენ დაესრულებინათ აღნიშნული პროექტი. "ქართული ოცნების" წევრმა დათა შელიამ სოციალურ ქსელში დაწერა, რომ მე ვავრცელებდი დეზინფორმაციას. მეორე პროექტი - ეს არის რუხი, ღურწკაიას და საქართველოს ქუჩებზე სანიაღვრე და მოხრეშვითი სამუშოები. სანიაღვრე სისტემის საგარანტიო ვადა არის ერთი წელი, 31 აგვისტომდე. დღეს კი სისტემა ფაქტობრივად არ არსებობს."- განაცხადა ბრიფინგზე "ნაციონალური მოძრაობის" წევრმა მაია კალანდიამ.

მაია კალანდიას განცხადებას გამოეხმაურა "ქართული ოცნების" წევრი და ზუგდიდის საკრებულოს დეპუტატი ოთარ ქადარიაც. მისი თქმით, კალანდიამ ანაკლიის მინი სტადიონის ძველი ფოტოები გაავრცელა. რეალურად კი სარეაბილიტაციო სამუშაოები უკვე დასრულებულია.

"საქმე ეხება მაია კალანდიას მიერ გავრცელებულ ფოტოებს, სადაც ის ანაკლიის მინი სტადიონის რეაბილიტაციამდე გადაღებულ ფოტოებს ავრცელებს და აცხადებს, რომ ეს ახლა გადაღებულია. კალანდიას მიერ გავრცელებულ კადრებში ანაკლიის დაზიანებული და შეუღებავი სტადიონი ჩანს, რეალურად კი სტადიონის რეაბილიტაცია უკვე დასრულებულია",- განაცხადა ზუგდიდის საკრებულოს წევრმა "ქართული ოცნებიდან" ოთარ ქადარიამ.  

11 აპრილს ზუგდიდის მუნიციპალიტეტის კეთილმოწყობის მართვის ცენტრმა გაავრცელა ფოტო მასალა, სადაც ჩანს, როგორ ღებავენ კეთილმოწყობის ცენტრი თანამშრომლები ანაკლიაში ესართიას ქუჩაზე არსებული სპორტული მოედნის ღობეს.




Print