ადამიანის უფლებათა ევროპულმა სასამართლომ საქართველოს საჩივარი საქმეზე "საქართველო რუსეთის წინააღმდეგ" ერთხმად დასაშვებად ცნო. სტრასბურგის სასამართლოს ამ ნაბიჯს სარჩელის განხილვა და შემდგომ ვერდიქტი მოჰყვება.
სარჩელში ნახსენებია ოკუპირებული გალის რაიონიდან დევნილი გიგა ოთხოზორიაც, რომელიც 2016 წლის მაისში ცეცხლსასროლი იარაღით მოკლა აფხაზმა ე.წ. მესაზღვრემ, რაშიდ კანჯი - ოღლიმ.

რადიო "ათინათი" გიგა ოთხოზორიას დედას ესაუბრა. ჯულიეტა ჭანტურია ფიქრობს, რომ ადამიანის უფლებათა ევროპული სასამართლოს მიერ, საქართველოს ხელისუფლების სარჩელის დასაშვებად ცნობა წინ გადადგმული ნაბიჯია და ჩვენს ქვეყანას ეძლევა შანსი, კიდევ ერთხელ დაამტკიცოს, რომ ოკუპანტმა ქვეყანამ ქართველი ხალხის მიმართ არაერთი დანაშაული ჩაიდინა.

"რა თქმა უნდა, ეს ერთი წინ გადადგმული ნაბიჯია, ყველა იმ საკითხის განსახილველად, რაც რუსეთმა საქართველოს წინააღმდეგ დააშავა. ძალიან სასიამოვნო იქნება ალბათ თითოეული ქართველისთვის, ეს ჩვენი "კეთილმოსურნე" მეზობელი, ჩვენთან განხორციელებული მოქმედებების გამო პასუხს თუ აქებს. საქართველოს ეძლევა ძალიან დიდი შანსი, როცა სხვადასხვა სახელმწიფოები გამოდიან რუსეთის წინააღმდეგ, უფრო და უფრო მეტი მტკიცებულება გამოჩნდება იმისა, თუ რა დანაშაული ჩაუდენია რუსეთს საქართველოში. უამრავი უდანაშაულო ქართველის სისხლის გამო უნდა აგოს რუსეთმა პასუხი,"- უთხრა რადიო „ათინათს“ ჯულიეტა ჭანტურიამ.

საქართველოს მთავრობა საჩივარში ამტკიცებს, რომ რუსეთი ჩართულია და კვლავ აგრძელებს საოკუპაციო ხაზის გასწვრივ საქართველოს მოსახლეობის შევიწროებას, უკანონო დაკავებებს, ეთნიკურად იმ ქართველების წამებას, მკვლელობასა და დაშინებას, ვინც შეეცადა გამყოფი საოკუპაციო ხაზის გადაკვეთას ან ვინც ამ ხაზთან ახლოს ცხოვრობს.

სარჩელი საქართველოს ხელისუფლებამ სტრასბურგის სასამართლოში 2018 წლის 22 აგვისტოს წარადგინა. ეს "საქართველო რუსეთის წინააღმდეგ" სახელმწიფოთაშორისი მეოთხე განაცხადია.

ამავე თემაზე:

სტრასბურგის სასამართლომ რუსეთის წინააღმდეგ საქართველოს მორიგი სარჩელი ერთხმად ცნო დასაშვებად