შეფასებისა და გამოცდების ეროვნული ცენტრის ინფორმაციით, 2024 წლის ერთიანი ეროვნული გამოცდებისათვის რეგისტრაცია დღეს, 18:00 საათზე დასრულდება.

ამავე ცნობით, დღესვე ამოიწურება საერთო სამაგისტრო გამოცდისათვის და სტუდენტთა საგრანტო კონკურსისათვის რეგისტრაციის ვადა.

აპლიკაციის შევსების პროცესი მიმდინარე წლის 4 მარტს დაიწყო და მიმდინარეობს მხოლოდ ელექტრონულად, შეფასებისა და გამოცდების ეროვნული ცენტრის ვებგვერდზე - online.naec.ge.

ის გრძელდება რამდენიმე ეტაპად:

"პირველ ეტაპზე აბიტურიენტი ვალდებულია შეავსოს პირადი მონაცემები, აირჩიოს საგამოცდო ქალაქი, ჩასაბარებელი საგნები და საჭიროების შემთხვევაში მონიშნოს სპეციალური პირობა;

საგნის შეცვლა ან დამატება, ასევე გამოცდის ენის შეცვლა აბიტურიენტებს 15 აპრილის 18:00 საათამდე შეეძლებათ;

საგანმანათლებლო პროგრამების ჩამონათვალში ცვლილებების შეტანის შესაძლებლობა გამოსაცდელებს აპელაციის შედეგების გამოქვეყნებიდან მომდევნო დღის 18:00 საათამდე ექნებათ", - მითითებულია ინფორმაციაში.

მათივე განმარტებით, ერთიანი ეროვნული გამოცდების ჩაბარების მსურველებმა რეგისტრაციამდე უნდა გადაიხადონ გამოცდაში მონაწილეობის საფასური - ერთი საგნისთვის 10 ლარი.

სამეგრელო - ზემო სვანეთის მასშტაბით, საგამოცდო ცენტრები 2024 წელს ზუგდიდსა და ფოთში განთავსდება.