"ენგურჰესისა" და ,,ვარდნილჰესების კასკადის“ საექსპორტო ელექტროენერგიის თურქეთში რეალიზაციაზე კონკურსი გამოცხადდა. ელექტროენერგიის საპროგნოზო მოცულობა, რომელიც განსაზღვრულია საქართველოს ენერგეტიკისა და ბუნებრივი რესურსების სამინისტროს მიერ, 2014 წლის განმავლობაში 200 მილიონ კვტ/სთ-ს შეადგენს. ექსპორტი, ძირითადად, ივნისში, ივლისსა და აგვისტოში უნდა განხორციელდეს. კონკურსში მონაწილეს უნდა გააჩნდეს თურქეთში ელექტროენერგიით საბითუმო ვაჭრობის, ან პირდაპირი მომხმარებლის უფლების დამადასტურებელი ცნობა. კომერციული წინადადება, სადაც 1 კვტ.სთ ელექტროენერგიის ფასი იქნება მითითებული, პრეტენდენტმა კომპანია ”ენგურჰესში” უნდა წარადგინოს. გარდა ამისა, თურქეთში მოქმედი ბანკებიდან გარანტია, მთლიანი სახელშეკრულებო ღირებულების 2%-ის ოდენობით. დახურული კონვერტები 3 თებერვალს გაიხსნება და ზეპირი ვაჭრობა გაიმართება. კონკურსში ის პრეტენდენტი გაიმარჯვებს, ვინც ყველაზე მაღალ ფასს დააფიქსირებს.