ენერგეტიკისა და ბუნებრივი რესურსების მინისტრმა კახა კალაძემ საქართველოში ყველაზე დიდი გენერაციის ობიექტი,  „ენგურის“ ჰიდროელექტროსადგური მოინახულა. “ენგურჰესი“ ქვეყნის ელექტრომომარაგებაში და ენერგეტიკული უსაფრთხოების თვალსაზრისით მნიშველოვან როლს თამაშობს. მისი დადგმული სიმძლავრე 1250 მგვტ-ია და სადგურის წილი ქვეყნის მთლიან წლიურ გენერაციაში 40%-ს შეადგენს. „ენგურჰესი“ წლების განმავლობაში, განსაკუთრებით ზამთრის პერიოდში საქართველოს მოსახლეობის ელექტრომომარაგებას უზრუნველყოფდა. კალაძის განცხადებით ენგურჰესის 4 აგრეგატი უკვე რეაბილიტირებულია და მიმდინარეობს მეხუთე აგრეგატის რეაბილიტაცია. მისივე განცხდაებით აფხაზეთის ელექტროენერგიით მომარაგება საქართველოს „ჰესების“ ხარჯზე ხდება და ეს შემდეგშიც ასე იქნება. „ახალი მთავრობის ერთ-ერთი მთავარი პრიორიტეტი იქნება ამ სადგურის უსაფრთხო და ეფექტური ექსპლუატაცია" - აღნიშნა მინისტრმა. "ენგურჰესი" - ს კაშხლის დეპარტამენტის თავმჯდომარის ჯონი ჭანიას განცხადებით დღეის მდგომარეობით წყალსაცავში წყლის დიდი მარაგია. “ენერგეტიკის სამინისტროს მიერ შემუშავებული სწორი სამუშაო გეგმის წყალობით ენერგეტიკული კრიზისი არ გვემუქრება“ - განაცხდა ჭანიამ.