ზუგდიდის ცენტრალურ ბიბლიოთეკაში წიგნების სერიის "ჩემი მეგრული ჯადოსნური ზღაპრების" პირველი წიგნის "კაჟანდიი ქერქუუს არიკის" პრეზენტაცია გაიმართა. სერია წარმოადგენს ქართველი ენათმეცნიერების - ალექსანდრე ცაგარელის, კორნელი დანელიასა და აპოლონ ცანავას მიერ მოპოვებული XIX-XX საუკუნეების მეგრული ზეპირსიტყვიერების ნიმუშების გაერთიანებას. წიგნები გამოიცა მეგრულ და ქართულ ენებზე.

"ჩემი მეგრული ჯადოსნური ზღაპრების" სერია 10 წიგნს აერთიანებს.  პროექტი ეკუთვნის კომპანია "არიკის", რომლის მიზანია ბოლო საუკუნე-ნახევრის განმავლობაში ჩაწერილი და გამოცემული მეგრული ზღაპრებისა და ზეპირსიტყვიერების სხვა ნიმუშების მკითხველთათვის ვიზუალურად საინტერესო, შემეცნებითი და მხატვრული ფორმით მიწოდება, საზოგადოებაში მეგრული ზეპირსიტყვიერებისადმი და ქართული კულტურის სუბკულტურისადმი ინტერესის გაღვივება.