ალბანეთში, ქალაქ დიურესში ძალოსნობაში გამართულ ევროპის ახალგაზრდულ
ჩემპიონატში ზუგდიდელმა გიორგი ჩხეიძემ მძიმე წონით (105+)
კატეგორიაში მორიგ წარმატებას მიაღწია. მან ატაცში 185 და აკვრაში
231, ჯამში 416 კილოგრამი მოაგროვა და სამი ვერცხლის
მედალი მოიპოვა.
„ მთელმა ნაკრებმა დავდეთ ის შედეგი, რასაც არ ველოდით. პირადად მე
ძალიან კმაყოფილი ვარ ჩემი შედეგით - ატაცში 1 კგ-ით მეტი პირადი
რეკორდი დავამყარე, ხოლო აკვრაში 9 კილოგრამით გავაუმჯობესე შედეგი,
რაც ორმაგად სასიხარულოა. ოქროს მედლისთვის ბრძოლა რთული იყო, სომეხი
მეტოქე ძლიერი გამოდგა და რეალურად მე ვერცხლისთვის ვიყავი მზად.
მაქსიმალურად დავიხარჯე და შრომა დამიფასდა“ - თქვა რადიო
„ათინათთან“ საუბრისას გიორგი ჩხეიძემ.
მისივე ინფორმაციით, ამავე ჩემიპიონატზე წარმატებით იასპარეზეს მისმა
ბიძაშვილებმა ძმებმა ირაკლი და გოგა ჩხეიძეებმა. ირაკლი ჩხეიძემ 20
წლამდეთა შორის 1 ვერცხლის და 1 ბრინჯაოს, ხოლო გოგა ჩხეიძემ 23
წლამდელთა შორის 1 ოქროს, 1 ვერცხლის და 1 ბრინჯაოს მედალი
მოიპოვა.
ევროპის ჩემპიონატზე ძალოსნობაში საქართველოს ეროვნული ნაკრების
ანგარიშზე სულ 27 - 13 ოქროს, 8 ვერცხლის და 6 ბრინჯაოს მედალია.
მასალის გამოყენების პირობები