„ანაკლიის განვითარების კონსორციუმის“ დამფუძნებელი მამუკა ხაზარაძე და გენერალური დირექტორი ლევან ახვლედიანი სამუშაო ვიზიტით ჩინეთში იმყოფებიან. მათ შეხვედრები გამართეს აზიის ინფრასტრუქტურის საინვესტიციო ბანკის AIIB -ის, ასევე უმსხვილესი ჩინური კორპორაციების - ZPMC -ისა და CDC – ის ხელმძღვანელობასთან. კონსორციუმის ცნობით, შეხვედრაზე განიხილეს ანაკლიის პორტისთვის საჭირო ამწე დანადგარების სპეციფიკა.

„სწორედ აქ დამზადდება ანაკლიის პორტისთვის საჭირო უახლესი თანამედროვე სტანდარტების ამწეები და საკონტეინერო ტერმინალის მართვისთვის საჭირო სხვა ტექნიკა“, - განაცხადა ანაკლიის განვითარების კონსორციუმის გენერალურმა დირექტორმა ლევან ახვლედიანმა.

მათივე ცნობით, ჩინურ საფინანსო ინსტიტუტებთან ანაკლიის პორტის ინვესტირებასთან დაკავშირებით მოლაპარაკებები აქტიურ ფაზაშია შესული.

ZPMC -ი საზღვაო საკონტეინერო ტექნიკის დამამზადებელი კორპორაციაა, ხოლო CDC – ი საინჟინრო კომპანია.