ახალი ამბები
სამინისტრო: ვმუშაობთ, რომ დადიანების მუზეუმის თანამშრომელთა შრომის ანაზღაურება მოწესრიგებული იყოს
განათლებისა და კულტურის სამინისტროში აცხადებენ, რომ უწყება მუშაობს, რათა ზუგდიდის დადიანების ისტორიულ-არქიტექტორული მუზეუმის თანამშრომელთა ანაზღაურება მოწესრიგებული იყოს. როგორც კულტურის დეპარტამენტის უფროსის მოადგილე თეა ონიანი ამბობს, ამისთვის სამინისტრო სხვადასხვა ქმედებას ახორციელებს. ამასთან, სამინისტროში ადასტურებენ, რომ მუზეუმის თანამშრომელთა ხელფასი მაღალი არ არის.

„სამინისტრო ხელს უწყობს სხვადასხვა პროექტის განხორციელებას. სამწუხაროდ, ანაზღაურება არ არის მაღალი, ამ მიზნითაც უწყება ახორციელებს შესაბამის ქმედებებს, რაც გამოიხატება იმაში, რომ სამინისტრომ შექმნას ინსტიტუციური განვითარების სრული შესაძლებლობა, რაც თავად მუზეუმსაც მისცემს დამატებითი სახსრების მოზიდვის შესაძლებლობას და ამ სახსრებიდან თანამშრომელთა შრომის ანაზღაურების გამოსწორებას. ასევე, საბიუჯეტო ასიგნებების ფარგლებში ვზრუნავთ იმაზე, რომ შრომის ანაზღაურების კომპონენტი იყოს მოწესრიგებული. დამატებითი ფინანსური რესურსის მოზიდვა ხელს უწყობს ვიზიტორთათვის შესაბამისი პირობების შექმნას, იძლევა დამატებითი რესურსის მოზიდვის საშუალებას, რაც განაწილებული იქნება შრომის ანაზღაურებაზე. მაგალითად, მიმდინარე წელს, საკუთარი შემოსავლიდან მიღებული 135 ათასიდან 29 ათასი ლარი გაიხარჯა სწორედ ანაზღაურებაზე და თუ მუზეუმის შემოსავალი იქნება მზარდი, ეს აისახება სათანადოდ შრომის ანაზღაურებაზე“, - აღნიშნა ონიანმა.
რაც შეეხება თავად მუზეუმს, თეა ონიანი განმარტავს, რომ სახელმწიფო დადიანების მუზეუმის, როგორც უმნიშვნელოვანესი ინსტიტუციის განვითარებისთვის, მუდმივად ზრუნავს. ონიანი დასძენს, რომ გარდა იმისა, რომ აქ დაცულია ეროვნული მემკვიდრეობის საგანძური, თავად შენობა-ნაგებობები წარმოადგენენ ეროვნული კატეგორიის ძეგლებს.

"გასულ წლებში ჩატარდა ნიკოსეული სასახლის რეაბილიტაცია, განახლდება ექსპოზიცია, რისთვისაც სამინისტრომ 70 ათასი ლარი გამოყო და ეს განახლებული ექსპოზიცია დამთვალიერებელთა მიღებას შეძლებს უკვე 2020 წლის გაზაფხულიდან. მიმდინარე წელს იგეგმება ეკატერინეს სასახლის რეკონსტრუქციის პროცესის დაწყება“, - აცხადებენ უწყებაში.
ზუგდიდის დადიანების სასახლეთა ისტორიულ-არქიტექტორული მუზეუმის თანამშრომლები ხელფასების მომატებას მოითხოვენ, წინააღმდეგ შემთხვევაში კი, გაფიცვას აანონსებენ. საკითხზე კონკრეტული პასუხის მისაღებად თანამშრომლებმა განათლებისა და კულტურის სამინისტროს ათდღიანი ვადა მისცეს.
Print