ფოთში, შს მომსახურების სააგენტოსთან მომხდარ მკვლელობასთან დაკავშირებით საპატრულო პოლიციის დეპარტამენტის უფროსმა ვაჟა სირაძემ ჟურნალისტებთან კომენტარი გააკეთა. მისი ინფორმაციით, დაკავებულია დანაშაულში ბრალდებული და მიმდინარეობს საგამოძიებო მოქმედებები.

"ფაქტზე დაწყებულია გამოძიება განზრახ მკვლელობის მუხლით. შსს-ის თანამშრომლების მიერ ცხელ კვალზე მყისიერად გატარებული ღონისძიებების შედეგად, სავარაუდო დანაშაულის ჩამდენი პირი დაკავებულია და მიმდინარეობს კომპლექსური საგამოძიებო მოქმედებები.

შსს 24 საათიან რეჟიმში მუშაობს და შესაძლებლობის ფარგლებში მაქსიმალურად ვახდენთ დანაშაულის პრევენციას", - თქვა ვაჟა სირაძემ.

ფოთში, მომსახურების სააგენტოსთან მამაკაცი საკუთარ ავტომობილში ჩაცხრილეს. არსებული ინფორმაციით, მას ცეცხლსასროლი იარაღიდან რამდენჯერმე ესროლეს. ის ადგილზევე გარდაიცვალა.