კორონავირუსის შემთხვევების მატების გამო გაგრის სკოლებში სასწავლო პროცესი შეჩერებულია. ასევე დაიხურა საბავშვო ბაღები. შესაბამის განკარგულებას 25 იანვარს გაგრის რაიონის ე.წ. ადმინისტრაციის ხელმძღვანელმა იური ხაგუშმა მოაწერა ხელი.
ამავე დოკუმენტის თანახმად, შეზღუდვები 1 თებერვლამდე იმოქმედებს, წერს "აფსნიპრესი"

აფხაზეთში 956 ადამიანი გამოიკვლიეს და მათგან 477 - ს კორონავირუსი დაუდასტურდა. ადგილობრივი ოპერატიული შტაბის მონაცემებით, ბოლო დღე - ღამის განმავლობაში კორონავირუსით კიდევ 1 პაციენტი გარდაიცვალა.

პანდემიის დაწყებიდან დღემდე აფხაზეთში Covid 19 - ით ინფიცირების 40875 შემთხვევა გამოვლინდა. გამოჯანმრთელდა 35413, გარდაიცვალა 588 ადამიანი.