აფხაზეთში დისლოცირებული რუსული ბაზის სამხედრო მოსამსახურეებს სწავლება ჩაუტარდათ. სამხრეთის სამხედროს ოლქის პრესსამსახურის ინფორმაციით, საბრძოლო მომზადების პროგრამის ფარგლებში, "სადაზვერვო ჯგუფებმა" წვრთნები წებელდის ნაღვალოუს პოლიგონზე გაიარეს. ამავე ცნობით, ტაქტიკურ - სპეციალურ სწავლებაში 300 სამხედრო მოსამსახურე და 40 ერთეული სამხედრო ტექნიკა იყო ჩართული.

მანამდე, აფხაზური მედია წერდა, რომ აფხაზეთში დისლოცირებული 100 - მდე რუსი სამხედრო 9 მაისს სოხუმში დაგეგმილი აღლუმისთვის ემზადება, ფაშიზმზე გამარჯვების 77- ე წლისთავის აღსანიშნავად. აღლუმში მონაწილეობას მიიღებს სამხრეთის სამხედრო ოლქის ბაზის სამხედრო ორკესტრიც.