ზუგდიდიდან თბილისამდე და პირიქით მიკროავტობუსებით მგზავრობა ხუთი ლარით გაძვირდა. ინფორმაცია რადიო "ათინათს" სამარშუტო ტაქსების მძღოლებმა დაუდასტურეს. მათი თქმით, დაახლოებით, ერთი კვირაა, რაც მგზავრებს დედაქალაქამდე მგზავრობისთვის 20-ის ნაცვლად 25 ლარის გადახდა უწევთ.

"გაძვირდა საწვავი და ამან გამოიწვია ფასის მომატებაც, რადგან ნაკლებ ფასად არ გვიღირს რეისების შესრულება", - ამბობენ მძღოლები.

რაც შეეხება ავტობუსებს, თბილისამდე მგზავრობა ისევ 20 ლარი ღირს.

ყველა სახის საწვავის ფასმა საქართველოში ბოლო 10 დღის განმავლობაში მოიმატა.