საქართველოს პრეზიდენტის სალომე ზურაბიშვილის განცხადებით, სამარცხვინოა, როდესაც ქვეყანაში ბავშვების თვალწინ ქალებს კლავენ. ამის შესახებ მან პოლიციის დღისადმი მიძღვნილ ღონისძიებაზე სიტყვით გამოსვლისას ისაუბრა. ზურაბიშვილი ამბობს, რომ ეს ქართული პოლიციისთვის გამოწვევაა.

„მართალია, სიტყვა „სამარცხვინო“ ზოგზოგიერთებს არ უყვარს, მაგრამ ჩემთვის და ვიცი, რომ თქვენთვისაც სამარცხვინოა, რომ დღეს საქართველოში ხდება ქალთა სასტიკი მკვლელობა ბავშვების თვალწინ. ვიცი, რომ ამას თქვენც არ მოითმენთ. თქვენთვისაც ეს დიდი გამოწვევაა და ამ კუთხით ბევრი რამ გაკეთდა. უკვე ბევრად უფრო დაცულად გრძნობენ თავს ქალები, როცა მიდიან პოლიციასთან და იციან, რომ ამას მოჰყვება შემაკავებელი ორდერი, ეს უკვე აღარ არის გამონაკლისი. მაგრამ ისიც ვიცით, თქვენც, მეც და ყველამ, რომ ძალიან ბევრი არის გასაკეთებელი ამ მიმართულებით იმისთვის, რომ ეს საქართველოში აღარ მოხდეს, ეს აღარ უნდა დავუშვათ, ეს არის ჩვენი ერთობლივი მიმართულება, რომ ყველა ნაბიჯი გადავდგათ, ყველა ზომა მივიღოთ. ეს იქნება მთავრობა, პარლამენტი, თუ თქვენი შიდა გადაწყვეტილებები, ყველანაირად უნდა ვეცადოთ, რომ მივაღწიოთ იმას, რომ ოჯახური ძალადობა ჩაბარდეს წარსულს და მაშინ ვიქნებით ნამდვილად თანამედროვე, ცივილიზებული, დემოკრატიული ქვეყანა და ეს იქნება თქვენი დამსახურება“, - განაცხადა ზურაბიშვილმა.

21 მაისს, გურამიშვილის გამზირზე მოძრავ ავტობუსში, როინ მებონიამ მეუღლეს ზუგდიდელ სოფი კვარაცხელიას არასრულწლოვანი შვილების თანდასწრებით, ცივი იარაღით სხეულის რამდენიმე ადგილზე მრავლობითი დაზიანებები მიაყენა, რის შედეგადაც ახალგაზრდა ქალი ადგილზე დაიღუპა.