ბიჭვინთის აგარაკის გადაცემის რატიფიცირებასთან დაკავშირებით რუსეთის საგარეო საქმეთა სამინისტროს მიერ აფხაზეთის დე ფაქტო რესპუბლიკის ე.წ. საგარეო უწყებისთვის გაგზავნილი ნოტა გამოაქვეყნა ტელეგრამ-არხმა „აფხაზური პორტალი“.

დოკუმენტში რუსული მხარე უკმაყოფილებას გამოხატავს ე.წ. პარლამენტის მიერ მიღებულ გადაწყვეტილებასთან დაკავშირებით.

„რუსული მხარე გაეცნო კონსტიტუციური კანონის შინაარსს და მიიჩნევს, რომ მისი ზოგი დებულება ეწინააღმდეგება ხელშეკრულებით გათვალისწინებულ და მხარეებს შორის შეთანხმებულ ნორმებს, რომელთა მიღებაც არსებით საფუძველს წარმოადგენდა რუსეთის ფედერაციისთვის შეთანხმებით გათვალისწინებულ ვალდებულებაზე თანხმობის გამოსახატად და რომლის გარეშეც შეთანხმებას რუსული მხარის მიერ ხელი ვერ მოეწერებოდა“, - ნათქვამია დოკუმენტში.

მოსკოვი, როგორც ვარაუდობდნენ, უკმაყოფილოა იმ ცვლილებებით, რომლებიც კრძალავს ობიექტის მესამე პირებისთვის გადაცემას.

„ეს დებულებები ეწინააღმდეგება ხელშეკრულების 26-ე მუხლს, რომლის თანახმად, მისი მოქმედების შეწყვეტა "არ გამოიწვევს საკუთრების უფლების შეწყვეტას რუსეთის ფედერაციის მიერ შეძენილ ამ შეთანხმების შესაბამის ობიექტზე, მათ შორის ყველა მოძრავ და უძრავ ქონებაზე“, - ნათქვამია რუსეთის საგარეო საქმეთა სამინისტროს ნოტაში.

გარდა ამისა, რუსეთის საგარეო უწყება უკმაყოფილოა შეთანხმების შესაძლო დენონსაციის პუნქტითაც.

„გარდა ამისა, კონსტიტუციური კანონის მე-3 მუხლის შესაბამისად, კონსტიტუციური კანონის „მე-2 მუხლის შეთანხმების მხარის(ების) მიერ შეუსრულებლობა იწვევს შეთანხმების დენონსაციას. ამავდროულად, ხელშეკრულება, მისი 26-ე მუხლის შესაბამისად, იდება 49 წლით და ავტომატურად გაგრძელდება შემდგომი 15 წლით, თუ რომელიმე მხარე არ აცნობებს მეორე მხარეს წერილობით, საწყისი ვადის გასვლამდე მინიმუმ 6 თვით ადრე მისი შეწყვეტის განზრახვის თაობაზე“, - ნათქვამია დოკუმენტში.

რუსული მხარე მიუთითებს, რომ საერთაშორისო სამართლის მიხედვით, ხელშეკრულების მოქმედება წყდება „მასში გათვალისწინებული წესით“.

„რუსული მხარე გამომდინარეობს იქიდან, რომ კონსტიტუციური კანონის მე-3 მუხლის მე-2 პუნქტით გათვალისწინებული გადაწყვეტილების შესრულების შემთხვევაშიც კი, შეთანხმება ძალაში დარჩება საწყისი პერიოდის 49 წლის ან შემდგომი 15 წლის გასვლამდე პერიოდით. ამასთან დაკავშირებით, აფხაზური მხარის მიერ კონსტიტუციური კანონის მე-3 მუხლის მე-2 პუნქტის შესაბამისად ხელშეკრულების დენონსირება დროის სხვა პარამეტრებში წარმოადგენს შეთანხმების დარღვევას“, - ნათქვამია დოკუმენტში.

მოსკოვი სოხუმისგან მოითხოვს, „დაადასტუროს თავისი ვალდებულების ერთგულება, შეასრულოს შეთანხმების ყველა დებულება გამონაკლისის გარეშე და მზადყოფნა, კეთილსინდისიერად შეასრულოს თავისი ვალდებულებები საერთაშორისო სამართლის საყოველთაოდ აღიარებული პრინციპებისა და ნორმების საფუძველზე“.

სოხუმი მოსკოვის ნოტას ჯერ არ გამოხმაურებია.

აფხაზეთის დე ფაქტო რესპუბლიკის ე.წ. პარლამენტმა 27 დეკემბერს გამთენიისას მოახდინა ბიჭვინთის აგარაკების შესახებ შეთანხმების რატიფიცირება, იმავე დილას, ე.წ. პრეზიდენტმა ასლან ბჟანიამ "პარლამენტის" მიერ მიღებულ კანონებს ხელი მოაწერა და დაამტკიცა ბიჭვინთის ყოფილი სახელმწიფო აგარაკის რუსეთისთვის გადაცემა.

ოკუპირებული აფხაზეთის ტერიტორიაზე არსებული ობიექტის რუსეთის ფედერაციის საკუთრებაში გადაცემისა და მისი გამოყენების წესის შესახებ ე.წ. შეთანხმებას სოხუმსა და მოსკოვს შორის 2022 წლის 19 იანვარს გაფორმდა.

დოკუმენტის თანახმად, ბიჭვინთის ცნობილი "სახელმწიფო აგარაკი" და მის გარშემო არსებული 186 ჰექტარი მიწის ნაკვეთი რუსეთის ფედერაციის მფლობელობაში 49 წლიანი იჯარით გადადის. მასთან ერთად, ხელშეკრულება ამ მიწის მიმდებარედ, საზღვაო სივრცის, 115 ჰექტარი ფართობის გადაცემის საკითხსაც ითვალისწინებს.

საქართველოს საგარეო საქმეთა სამინისტრომ ბიჭვინთის აგარაკის გასხვისებასთან დაკავშირებით განცხადება გაავრცელა, რომელშიც ნათქვამია, რომ ნებისმიერი მსგავსი სახის ე.წ. შეთანხმება იურიდიული ძალის არმქონე და ბათილია.

"ეს, როგორც ყველა სხვა გადაწყვეტილება, რომელიც ეხება აეროპორტს, რომელიც ეხება ოჩამჩირეს, არის არალეგალური და ხალხის ნების გარეშე მიღებული გადაწყვეტილება", - ასე გამოეხმაურა ბიჭვინთის "შეთანხმების რატიფიცირებას" საქართველოს პრეზიდენტი სალომე ზურაბიშვილი.