ზუგდიდში, კოსტავას #7-ში სასწავლო ცენტრი "მესიაკონი" გაიხსნა, სადაც მე-6 კლასამდე მოსწავლეებს მიიღებენ. ცენტრის დირექტორის მაია რიგვავას თქმით, სერტიფიცირებული პედაგოგები ბავშვებს სასკოლო საგნების სრულად მომზადებაში დაეხმარებიან.
ამასთან, მოსწავლეებს შესაძლებლობა ექნებათ დამატებითი უნარ-ჩვევები შეიძინონ. ცენტრის მოსწავლეები ინგლისური ენის გრამატიკას და მათემატიკას გაძლიერებული პროგრამით შეისწავლიან.

"პანდემიამ ძალიან ბევრ სფეროში შექმნა პრობლემები და განსაკუთრებით ეს დაეტყო განათლების სფეროს. ჩვენს შვილებს ძალიან შეუშალა ხელი თუნდაც სკოლის დისტანციურ რეჟიმზე გადასვლამ. აქედან გამომდინარე, ჩვენმა კოლექტივმა გადავწყვიტეთ, რომ შეგვეძლო დავხმარებოდით ჩვენს ქალაქში მყოფ პატარებს, მშობლებსაც რასაკვირველია, რომ შეგვემსუბუქებინა, ხელი შეგვეწყო განათლების უკეთ მიღებაში. აქედან გამომდინარე, გადავწყვიტეთ გაგვეხსნა სასწავლო ცენტრი "მესიაკონი", სადაც პატარები შეძლებენ, რომ დილიდან საღამომდე უსაფრთხო, კომფორტულ გარემოში მიიღონ განათლება, სწავლების თანამედროვე მეთოდებით", - ამბობს მაიკო რიგვავა.

მისივე განმარტებით, ჯგუფში მხოლოდ 5 ბავშვი იქნება, რაც მოსწავლის მაქსიმალურ ჩართულობას უზრუნველყოფს.

"გარდა იმისა, რომ ჩვენს სასწავლო ცენტრში თქვენს შვილებს დავეხმარებით სრული სასკოლო პროგრამის მომზადებაში, ჩვენთან შეისწავლება ინგლისური ენის გრამატიკის და მათემატიკის გაძლიერებული კურსი. პროგრამაში გათვალისწინებული გვაქვს განვუვითაროთ თქვენს შვილებს ის უნარ-ჩვევები, რომელიც აუცილებელია იმისთვის, რომ თანამედროვე განათლების სისტემას მოერგოს ბავშვი. ეს არის პრეზენტაციების მომზადების უნარი, თემების და ესსეების წერის უნარი, ვიმუშავებთ ყველა მიმართულებით.  ერთდროულად ჯგუფში 5 ბავშვი იქნება, ჯგუფურ მუშაობასაც უნდა შეეჩვიოს ბავშვი და ეს არის ოპტიმალური რაოდენობა", - აღნიშნავს ცენტრის დირექტორი.

ობიექტი მდებარეობს ქალაქის ცენტრში, იზოლირებულ და ბავშვებისთვის უსაფრთხო გარემოში. თითო ჯგუფის მეცადინეობები, დაახლოებით, 4 საათი გაგრძელდება.