ზუგდიდის მუნიციპალიტეტი ენმ-ის ბრალდებებს პასუხობს (ვიდეო)
15:41 / 08.05.2017
ზუგდიდის მუნიციპალიტეტის გამგებლის მოადგილე მამუკა წოწერია ენმ-ის
წევრის ლევან თორიას ბრალდებას ბრალდებითვე პასუხობს. ის ამბობს, რომ
თორია
ციფრებით მანიპულირებს და მის მიერ გაჟღერებული
ინფორმაცია გამგეობის ფაქტობრივ ხარჯს არ შეესაბამება.
,,2016 წელს მუნიციპალიტეტის გამგეობის და ქალაქის მერიის
ავტოსატრანსპორტო საშუალებების საექსპულატაციო ხარჯებმა 259 000 ლარი
შეადგინა. რაც შეეხება წარმომადგენლობით ხარჯებს, ჩვენ წლის
განმავლობაში საკრებულოს და გამგეობას ორივეს ერთად 5 949 ლარი
გვქონდა ხარჯი. შედარებისთვის მინდა მოგიყვანოთ 2012 წლის მონაცემები
იგივე სახის ხარჯებთან დაკავშირებით. 2012 წელს ზუგდიდის
მუნიციპალიტეტის მიერ მხოლოდ სატრანსპორტო საშუალებების
საექსპლუატაციო ხარჯებისთვის გამოყოფილი აქვს 480 ათას ლარზე მეტი,
ხოლო წარმომადგენლობითი ხარჯებისთვის 45 ათას ლარამდე. ეს მაშინ, როცა
არცერთ ადმინისტრაციულ ერთეულს არ ემსახურებოდა არც დასუფთავების და
არც კეთილმოწყობის სამსახური", - განმარტა წოწერიამ.
რაც შეეხება ზუგდიდის მერიას, იქ აცხადებენ, რომ თორიას მიერ
გახმოვანებული ციფრები არარეალურია, არსებული ინფორმაცია საჯაროა და
ნებისმიერ დაინტერესებულ პირს შეუძლია გამოითხოვოს ინფორმაცია.
ცნობისთვის, „ერთიანი ნაციონალური მოძრაობის“ წევრმა ლევან თორიამ
პარტიის ზუგდიდის ორგანიზაციის ოფისში დღეს ბრიფინგი გამართა. მან
ადგილობრივი ხელისუფლება ბიუჯეტის გაფლანგვაში დაადანაშაულა და
განაცხადა, რომ „ქართული ოცნება“ ხალხის ფულს პირადი ინტერესებისთვის
იყენებს.
მასალის გამოყენების პირობები