ხმაურიანი დაპირისპირება გაერთიანებული ოპოზიციის ოფისთან და ურთიერთბრალდებები (ვიდეო)
14:55 / 24.11.2018
გაერთიანებული ოპოზიციის ზუგდიდის ოფისთან შეკრებილმა აქციის მონაწილეებმა მიმდებარე ტერიტორია დატოვეს. ისინი გუშინ ოპოზიციურ
პარტიასთან მომხდარ ინციდენტს აპროტესტებდნენ, თუმცა აქცია დაპირისპირებაში გადაიზარდა. აქციის ერთ-ერთი ორგანიზატორის ნიკა მაქაცარიას ინფორმაციით, ისინი მშვიდობიან პროტესტს აპირებდნენ, თუმცა მისივე თქმით, ენმ-მ მათ პროვოკაცია მოუწყო.
"მათი მხარდამჭერების ასე მობილიზება და დახვედრა ჩვენთვის რა საჭირო იყო, ეს არის პროვოკაცია მშვიდობიანი აქციის წინააღმდეგ. მე გუშინ ჩემს მეგობრებს, მედია-ორგანიზაცია "მეველეს" ჟურნალისტებს ვეხმარებოდი, საჭესთან ვიჯექი, როცა ეს ინციდენტი მოხდა", - თქვა ზუგდიდის ააიპ-ის თანამშრომელმა ნიკა მაქაცარიამ.
თავის მხრივ, გაერთიანებული ოპოზიციის ზუგდიდის შტაბში აცხადებენ, რომ აქციაზე არა ჩვეულებრივი მოქალაქეები, არამედ მერიაში დასაქმებული ააიპ-ების თანამშრომლები გამოიყვანეს.
"ესენი ასრულებენ პირადად შს მინისტრის დავალებას და სირცხვილია, რომ მერიის თანამშრომლებს იყენებენ ასეთი რამეებისთვის და იყენებენ ზონდერებად", - აღნიშნა წითლიძემ.
აქციის მონაწილეების თქმით, ისინი გაერთიანებული ოპოზიციის შტაბის ქმედებას აპროტესტებენ და ამბობენ, რომ "ნაციონალური მოძრაობის" რეჟიმის დაბრუნებას არ დაუშვებენ. მათ ხელში ეჭირათ ტრანსპარანტები წარწერებით: "არა ნაცებს", "რატომ გსურთ ქვეყანაში დესტაბილიზაცია" და სხვა.
აქციის მონაწილეებმა მსვლელობა ზუგდიდის ცენტრალური ბულვარიდან დაიწყეს.
მასალის გამოყენების პირობები