ზუგდიდში მოქმედი არასამთავრობო ორგანიზაციების წარმომადგენლები საკრებულოს სხდომაზე საპროტესტო ტრანსპარანტებით მივიდნენ.  "კი ევროპას, არა რუსულ კანონს", -ამ შინაარსის პლაკატებით მათ ე.წ. აგენტების შესახებ კანონის  წინააღმდეგ პროტესტი გამოხატეს.


„საქართველოს პარლამენტში ხელახლა ინიციირებული კანონი თავისი შინაარსით, მიზნებით, სურვილებით, წმინდა რუსული კანონია. ეს კანონი, თუკი მიიღეს, უკარგავს საქართველოს, ევროპულ ოჯახში სრულფასოვანი გაწევრიანების შანსს. ეს კანონი მიზანმიმართულია იქითკენ, რომ ქვეყანაში გაჩერდეს, გაუქმდეს, კრიტიკული აზრი. დაუშვებელია ამ კანონის მიღება! არ შეიძლება, ქვეყანაში, რომელიც ევროპისკენ მიისწრაფვის, რუსული კანონი მოქმედებდეს", - უთხრა ჟურნალისტებს „საერთაშორისო გამჭვირვალობა - საქართველოს“ ზუგდიდის რეგიონული წარმომადგენლობის კოორდინატორმა არჩილ თოდუამ.

მისი თქმით, იდენტური შინაარსის კანონით, რუსეთში გაუქმდა მედია და არასამთავრობო ორგანიზაციები, კრიტიკული აზრი, ამიტომაც დაუშვებელია ამ კანონის მიღება საქართველოში.


დემოკრატიული ჩართულობის ცენტრების ქსელის ზუგდიდის ოფისის კოორდინატორი, ეკა მინჯორაია ამბობს, რომ "უცხო ქვეყნის აგენტების შესახებ" კანონის ერთადერთი დანიშნულებაა კრიტიკული აზრის გაქრობა:

„ხელისუფლების მხრიდან საუბარი იმაზე, რომ კანონპროექტი ეხება არასამთავრობო ორგანიზაციების და ასევე, კრიტიკულად განწყობილი მედიასაშუალებების გამჭვირვალობას, არის ტყუილი, გამომდინარე იქიდან, რომ არასამთავრობო ორგანიზაციების ფინანსური ანგარიშები არის სრულიად გამჭვირვალე შესაბამის უწყებებში. ეს არის სრული სიცრუე, ეს ემსახურება იმას, რომ ქვეყანაში კრიტიკული აზრი არ არსებობდეს", - განაცხადა მან.  



პროტესტს შეუერთდნენ ფრაქცია "ახალის" წევრებიც. 

საკრებულოს დღევანდელ სხდომაზე ისევ არ გამოცხადდნენ "ქართული ოცნებისა" და "ნაციონალური მოძრაობის" წევრები. სხდომა პარასკევის შემდეგ მეოთხედ გადაიდო.

ინფორმაციისთვის, 3 აპრილს "ქართული ოცნების" აღმასრულებელმა მდივანმა მამუკა მდინარაძემ თქვა, რომ მმართველი პარტია "უცხოური გავლენის გამჭვირვალობის შესახებ" კანონს მეორედ დააინიცირებდა. საქართველოს პარლამენტის ბიურომ  კანონპროექტი 8 აპრილს დაარეგისტრირა. დოკუმენტი კი იურიდიულ საკითხთა კომიტეტს გადაეცა, რომელიც მის განხილვას 12 აპრილს დაიწყებს.

2023 წლის 7 მარტს პარლამენტმა პირველი მოსმენით მიიღო კანონი "უცხოური გავლენის აგენტების" შესახებ, რასაც საკანონმდებლო ორგანოს შენობასთან ათასობით მოქალაქის შეკრება მოყვა. აქციის დასაშლელად ძალოვნებმა გამოიყენეს წყლის ჭავლი, ცრემლმდენი გაზი და ე.წ. წიწაკის სპრეი. დაშავდა ათობით ადამიანი, 66 პირი კი დააკავეს. საპროტესტო აქცია სლოგანით "არა რუსულ კანონს" გაიმართა ზუგდიდშიც. 9 მარტს კი "ქართული ოცნების" პოლიტსაბჭოსა და "ხალხის ძალას" შორის კონსულტაციების შედეგად, აღნიშნული კანონპროექტის პარლამენტიდან გაწვევის გადაწყვეტილება მიიღეს, ხოლო 10 მარტს პარლამენტმა მეორე მოსმენით ჩააგდო დოკუმენტი.

ამავე თემაზე:

რადიო "ათინათი" სხვა მედიებთან ერთად ე.წ აგენტების კანონის პარლამენტში წარდგენას აპროტესტებს

არა რუსულ კანონს - აქცია ზუგდიდში

"არა რუსულ კანონს" - საპროტესტო აქციის მეორე დღე ზუგდიდში (ფოტო)

რადიო "ათინათი" არ გეგმავს "უცხოური გავლენის აგენტად" დარეგისტრირებას - განცხადება

რუსული კანონი არ არის საქართველოს არჩევანი - არასამთავრობო და მედიაორგანიზაციების ერთობლივი განცხადება