სანდრო გირგვლიანის საქმეზე მოსამართლე დავით მგელიაშვილი განაჩენს დღეს, 12.00 საათზე გამოაცხადებს. გირგვლიანის საქმის განხილვა საქალაქო სასამართლომ 10 ოქტომბერს დაასრულა. მხარეებმა წინა სხდომაზე რეპლიკები წარმოთქვეს, რის შემდეგაც მოსამართლე სათათბიროდ გავიდა და განაჩენის გამოცხადების თარიღად 20 ოქტომბერი განსაზღვრა.
როგორც პროცესის დასრულების შემდეგ საქმის პროკურორმა ირაკლი ნადარეიშვილმა განაცხადა, ბრალდებულების მიმართ გამამტყუნებელი განაჩენის მოლოდინი აქვს. პროკურორის თქმით, გარდა დაცვის მხარის მიერ წარმოდგენილი ჩვენებებისა, საქმეში არ არსებობს არც ერთი მტკიცებულება, რომელიც ბრალდებულების ბრალეულობას ეჭვქვეშ დააყენებდა. თავის მხრივ, დაცვის მხარე ვარაუდობს, რომ მოსამართლე ბრალდებულების მიმართ გამამართლებელ განაჩენს გამოიტანს.
გირგვლიანის საქმეზე ამ ეტაპზე ბრალდებულები არიან შინაგან საქმეთა ყოფილი მინისტრი ვანო მებარიშვილი, შსს-ს ყოფილი თანამშრომელი გერონტი ალანია და ოქროყანის ეპიზოდზე ბრალდებული ვალერიან მეტრეველი.
როგორც ცნობილია, ალანია ძებნაში იმყოფება, მერაბიშვილი და მეტრეველი კი პატიმრობაში არიან და საკუთარი გადაწყვეტილებით საქმის განხილვებში არ მონაწილეობდნენ. ამ საქმეზე ასევე ბრალდებულები არიან დათა ახალაია და ოლეგ მელნიკოვი, თუმცა მელნიკოვს აღიარებითი ჩვენების შემდეგ საპროცესო შეთანხმება გაუფორმდა, დათა ახალაიას საქმე კი მისი საბერძნეთიდან ექსტრადირების საკითხის გადაწყვეტამდე ცალკე წარმოებად არის გამოყოფილი. გირგვლიანის საქმე ორ ეპიზოდს მოიცავს, მეორე ეპიზოდია, ვამეხ აბულაშვილისა და კახაბერ დაბრუნდაშვილის ოქროყანაში ცემის ფაქტი. პროკურატურის მასალებით აღნიშნული პირების ცემა ოქროყანაში იგივე სცენარით მოხდა, როგორც გირგვლიანის შემთხვევაში. საქმეში ბრალდბული ვალერიან მეტრეველი სწორედ საქმის ამ ეპიზოდზეა ბრალდებული. გირგვლიანის საქმეს საქალაქო სასამართლო რამდენიმე თვის განმავლობაში იხილავდა.
მასალის გამოყენების პირობები