ზუგდიდის მუნიციპალიტეტის თვითმმართველ ორგანოში მოქმედ საკონკურსო-საატესტაციო კომისიის წევრებს  კონკურსანტები არაობიექტურობაში ადანაშაულებენ.  მათ კონკურსის მესამე - გასაუბრების ეტაპთან დაკავშირებით აქვთ პრეტენზიები, რომელსაც ზუგდიდის რაიონულ  სასამართლოში გაასაჩივრებენ.  აპლიკანტები: ბადრი დარასელია,  ციცინო ფიფია და  ვიქტორია ბუკია კომისიის წევრების  არაკომპეტენტურობაზეც საუბრობენ და აცხადებენ, რომ კომისიამ  თანამშრომლები  ნაცნობობითა და პირადი სიმპატიებით შეარჩია. "გასაუბრება გავიარე, როგორც ქალაქის ასევე, მუნიციპალიტეტში მოქმედ საკონკურსო-საატესტაციო კომისიასთან, რადგან განაცხადი ორივეგან მქონდა გაკეთებული.  გასაუბრებები ერთმანეთს შევადარე და თამამად შემიძლია ვთქვა,  რომ მუნიციპალიტეტში ჩატარებული გასაუბრება სრული ფარსი იყო", - თქვა აპლიკანტმა ბადრი დარასელიამ. ზუგდიდის მუნიციპალიტეტის გამგეობის ყოფილი თანამშრომელი ციცინო ფიფია ამბობს, რომ მიუხედავად იმისა, რომ მან გასაუბრების ეტაპი წარმატებით გაიარა,  კომისიისგან მაინც უარყოფითი პასუხი მიიღო. "კომისიის პასუხი იყო ზოგადი და არ იყო მითითებული თუ რატომ მითხრეს უარი. კომისია იყო სუბიექტური და არაკომპეტენტური", - თქვა ზუგდიდის მუნიციპალიტეტის ყოფილმა თანამშრომელმა ციცინო ფიფიამ. ციცინო ფიფიას მსგავსად,  კომისიას არაკომპეტენტურობაში ადანაშაულებს ვიქტორია ბუკიაც.  ის სასამართლოში ჩივილს გეგმავს და გამარჯვებაშიც დარწმუნებულია. "არც ერთი კითხვა არ დასმულა პროფესიულ უნარ-ჩვევებზე.  კითხვები დაისვა კანონებიდან, რომელიც ჩვენ უკვე ჩაბარებული გვქონდა ტესტირებაზე", - ამბობს ვიქტორია ბუკია. აპლიკანტების ბრალდებებს დღესვე უპასუხა ზუგდიდის მუნიციპალიტეტში მოქმედი საკონკურსო-საატესტაციო კომისიის თავმჯდომარემ ლაშა გოგიამ. "საპრეტენზიო კომისიაში სულ 8 საჩივარი შევიდა.  კომისიამ თითოეული აპლიკანტის საჩივარი განიხილა. ასევე, მოუსმინა გასაუბრების აუდიო ჩანაწერს და ამის მიხედვით იქნა მიღებული გადაწყვეტილება.  მათ შეუძლიათ მიმართონ სასამართლოს", -განუცხადა ჟურნალისტებს  ლაშა გოგიამ. ზუგდიდის მუნიციპალიტეტის საკრებულოსა და გამგეობაში დასაქმების მსურველთა ტესტირების პროცესი 5-8 დეკემბერს ჩატარდა. კონკურსის შედეგად 159 თანამშრომელი შეირჩა. აქედან, 42 ახალი კადრია.