სამეგრელო-ზემო სვანეთის დევნილთა სამმართველოში ახალგაზრდა ქალი, რომელიც უკვე რამდენიმე თვეა ბინის მიღებას ითხოვს, შეუძლოდ შეიქმნა. ლელა შამათავა, რომელსაც მედიკოსებმა სამედიცინო დახმარება ადგილზე აღმოუჩინეს, ამბობს, რომ მან თბილისში დევნილის ბინა საკუთრებაში მიიღო, თუმცა საბუთებზე მოტყუებით მოაწერინეს ხელი და საცხოვრებელი ფართი იპოთეკით დატვირთვის შემდეგ დაკარგა. ამჟამად, ის დროებით ხობში ცხოვრობს. ლელა შამათავა მეორე ჯგუფის შშმ პირია, ის ეპილეფსიით არის დაავადებული.

"მეუბნებოდნენ გიმკურნალებთო, მაგრამ მომატყუეს, მე ის ფული არ მინახავს", - თქვა მან.

რადიო "ათინათის" კითხვაზე, თუ რატომ არ მიმართავს ის ბინის დაკარგვის საქმეზე პროკურატურას, შამათავამ ადექვატური პასუხი ვერ გაგვცა.

დევნილთა სამმართველოში აცხადებენ, რომ შამათავას ბინით ხელმეორედ უზრუნველყოფა შეუძლებელია, თუმცა მათივე თქმით, მას სხვადასხვა სახის დახმარებას სთავაზობენ, რაზეც ის უარს აცხადებს.