საქართველოს მთავრობის განკარგულებით ზუგდიდის ათ ქუჩას რეაბილიტაცია ჩაუტარდება. ამის შესახებ ინფორმაცია დღეს სამხარეო ადმინისტრაციაში გამართულ  საბჭოს სხდომაზე გაჟღერდა. ამ ეტაპზე შემდეგი ქუჩები შეკეთდება: ხელაიას, ჩიქობავას, ლაზის, ბარამიას, ქობულეთის, ზვიად გამსახურდიას, კონსტანტინე გამსახურდიას, თამარ მეფის და თაბუკაშვილის.

სამეგრელო-ზემო სვანეთის გუბერნატორის ალექსანდრე მოწერელიას ინფორმაციით, მთავრობის განკარგულებით, საავტომობილო გზების დეპარტამენტს დასაფინანსებლად  რუხი-რიყე-ტყაიას გზის 10 კილომეტრიანი მონაკვეთი გადაეცა.

„ზუგდიდში გადაწყვეტილია 10 ქუჩის მოწესრიგება- რეაბილიტაცია. ეს ძირითადად, ის ქუჩებია, სადაც არის მძიმე მდგომარეობა. ვიცით, რომ ზუგდიდში წყალარინების და კანალიზაციის სისტემის რეაბილიტაციის გამო გაუვალი გახდა ქუჩები“, - აღნიშნა მოწერელიამ.

სხდომაზე ასევე განიხილეს ანაკლია-განმუხურში, აბაშაში, ხობში, წალენჯიხაში, ჩხოროწყუში, ფოთსა და მარტვილში განსახორციელებელი ინფრასტრუქტურული პროექტები. შეხვედრას მუნიციპალიტეტის მერები ესწრებოდნენ.