"თავისუფალი ზონის" წარმომადგენლები "თავისუფალი თაობის" წარმომადგენლებს მათ ოფისზე თავდასხმაში ადანაშაულებენ.
"თავისუფალი თაობის" წარმომადგენლების განცხადებით, ისინი "თავისუფალი ზონის" ოფისთან "ასავალ-დასავალის" ჟურნალისტის, ზაზა დავითაიას ცემის გამო შეიკრიბნენ, რა დროსაც მათ "თავისუფალი ზონის" წევრებმა ფიზიკური შეურაცხყოფა მიაყენეს. "თავისუფალი ზონის" წევრები კი ამბობენ, რომ "თავისუფალი თაობის" 50-მდე წარმომადგენელი ოფისში შეიჭრა და ამას მოჰყვა დაპირისპირება.
ფიზიკური დაპირისპირების დროს რამდენიმე პირი დაშავდა, მათ შორის "თავისუფალი ზონის" ხელმძღვანელი კობა ხაბაზი. ჩხუბის დროს ჩაიმსხვრა მინები, რაშიც დაპირისპირებული მხარეები ერთმანეთს ადანაშაულებენ.
როგორც კობა ხაბაზმა განაცხადა, შინაგან საქმეთა სამინისტრო წინასწარ ჩააყენეს საქმის კურსში, რომ თავდასხმა იგეგმებოდა.
"თუმცა, სამწუხაროდ, შინაგან საქმეთა სამინისტრომ ივანიშვილი-ღარიბაშვილის "ტიტუშკებს" მისცა საშუალება შემოჭრილიყვნენ ოფისში ხელკეტებით შეიარაღებულები და მოეწყოთ დებოში. არასდროს ვატარებ იარაღს მარტივი მიზეზის გამო - მუშტით უკეთესად გავუსწორდები ტრისტან წითელაშვილისთანა სამშობლოს გამყიდველებს", - განაცხადა კობა ხაბაზმა.
ადგილზე "ნაციონალური მოძრაობის" ლიდერებიც მივიდნენ.
"თავისუფალი ზონის" ოფისთან რამდენიმე საპატრულო ეკიპაჟი იყო მობილიზებული. დაპირისპირების დროს პოლიციამ რამდენიმე პირი დააკავა.
"თავისუფალი ზონის" ოფისთან დაპირისპირებამდე, გაზეთ "ასავალ-დასავალის" ჟურნალისტ ზაზა დავითაიას ცემის ფაქტთან დაკავშირებით სამართალდამცველებმა "თავისუფალი ზონის" წევრი ფარნაოზ ჭკადუა დააკავეს.
მასალის გამოყენების პირობები