სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე სომხეთის რესპუბლიკის ეროვნული ასამბლეის თავმჯდომარეს გალუსტ საჰაკიანს და სომხური დელეგაციის წევრებს გუშინ საპატრიარქოში შეხვდა. შეხვედრის დასაწყისში მხარეებმა ხაზი გაუსვეს ორ ქვეყანას შორის ისტორიულ კავშირს და საერთო ქრისტიანულ ფასეულობებს. უწმინდესმა აღნიშნა, რომ ძალიან დიდი მნიშვნელობა აქვს ძმურ და მეგობრულ ურთიერთობებს ორი ქვეყნის ეკლესიას შორის.
პატრიარქის თქმით, საქართველოსა და სომხეთს შორის ტრადიციულად კარგი ურთიერთობები იყო და ეს დღესაც გრძელდება. "ძალიან დიდი მნიშვნელობა აქვს მეგობრულ და ძმურ ურთიერთობას ეკლესიებს შორის. ჩვენ დიდად ვაფასებთ თქვენს კულტურას, თქვენს მწერლობას. სომხეთი და საქართველო არის ქრისტიანული ოაზისი და ამ ოაზისს ჩვენ უნდა გავუფრთხილდეთ. ყველაფერი უნდა გავაკეთოთ იმისათვის, რომ ჩვენი ძმური ურთიერთობა არ დაირღვეს. კიდევ ერთხელ მოგესალმებით, მივესალმები დელეგაციის ყველა წევრს. მოხარული ვარ, რომ საქართველოში ჩამობრძანდით", - აღნიშნა შეხვედრაზე საქართველოს კათოლიკოს-პატრიარქმა.
თავის მხრივ, საუბრის დასაწყისში სომხეთის რესპუბლიკის ეროვნული ასამბლეის თავმჯდომარემ, გალუსტ საჰაკიანმა პატრიარქს ძმის გარდაცვალების გამო მიუსამძიმრა და გულთბილი მიღებისათვის მადლობა გადაუხადა.
საჰაკიანის განცხადებით, სომხეთი რჩება უმთავრესი ქრისტიანული ფასეულობების მემკვიდრედ. "ჩვენი ერებიდან გამომდინარე, უმთავრესი საფუძველი ქრისტიანული ფესვებია და ჩვენ ვრჩებით ამის გამგრძელებლად. კულტურული და რელიგიური ფასეულობები გააღრმავებენ, დააახლოებენ და ახალ ბიძგს მისცემენ ჩვენი სახელმწიფოების ურთიერთობას. ამ ყველაფერში ძალიან დიდი მნიშვნელობა აქვს ორი ქვეყნის ეკლესიას", - აღნიშნა სომხეთის რესპუბლიკის ეროვნული ასამბლეის თავმჯდომარემ.
მასალის გამოყენების პირობები