იუსტიციის სამინისტრო აუცილებლად გამოძებნის გამოსავალს ყველა იმ უცხოელისთვის, რომელმაც ვიზებთან დაკავშირებული ახალი რეგულაციების ამოქმედებამდე არ ისარგებლა იმ ხუთთვიანი პერიოდით, რომელიც მათ საბუთების მოსაწესრიგებლად მივეცით, - ამის შესახებ ჟურნალისტებს იუსტიციის მინისტრმა თეა წულუკიანმა ვიზებთან დაკავშირებული ახალი რეგულაციების შესაძლო შემსუბუქების საკითხის კომენტირებისას განუცხადა.
მისი თქმით, იუსტიციის სამინისტრო მისცემს საშუალებას უცხო ქვეყნის მოქალაქეებს, რომ მათ ყველა საბუთი მოაწესრიგონ, რათა გააგრძელონ საქმიანობა საქართველოში.
"იუსტიციის სამინისტრო აუცილებლად გამოძებნის გამოსავალს ყველა იმ უცხოელისთვის, რომელმაც არ ისარგებლა იმ ხუთთვიანი პერიოდით, რომელიც მათ მარტიდან სექტემბრამდე მივეცით, რომ მოეწესრიგებინათ თავიანთი საბუთები. როგორც ჩანს, ისინი ზედაპირულად მოეკიდნენ ამ საკითხს, ან არ ეცალათ. მიუხედავად ამისა, ჩვენ დამატებით დროს მივცემთ მათ ყველა საბუთის მოსაწესრიგებლად, რათა ვინც მუშაობს საქართველოში, გააგრძელოს მუშაობა, ვინც სწავლობს საქართველოში, გააგრძელოს სწავლა და არ ჰქონდეთ არავითარი შფოთვის საგანი, რომ ისინი დროულად ვერ მიიღებენ საბუთს. იუსტიციის სახლში არის სპეციალურად გამოყოფილი ადგილები, რომ უცხოელები ურიგოდ მიიღოს და მაქსიმალურად კომფორტულ გარემოში გაეწიოთ კონსულტაცია", - აღნიშნა თეა წლუკიანმა.
მასალის გამოყენების პირობები