პროექტები განსახილველად ჯერ იურიდიულ საკითხთა კომიტეტზე, შემდეგ ადამიანის უფლებათა დაცვის კომიტეტზე გავა. როგორც ცნობილია, ბიუროს გადაწყეტილებით, იურიდიულ საკითხთა საპარლამენტო კომიტეტს პროექტებთან დაკავშირებით წამყვანი კომიტეტის რანგში გამოსვლის შესაძლებლობა არ მიეცა, ამიტომ ხმალაძის კომიტეტი მხოლოდ სავალდებულო დასკვნას დაწერს, წამყვანი კი, ეკა ბესელიას კომიტეტი იქნება.
ბესელია-ფოფხაძე-სესიაშვილის საკანონმდებლო პროექტი ფარული მოსმენების ორგასაღებიანი სისტემის ამოქმედებას ითვალისწინებს, რომელთაგან ერთი "გასაღები" შს სამინისტროს რჩება, ხოლო მეორე პერსონალურ მონაცემთა დაცვის ინსპექტორის ხელში იქნება. ავტორთა მტკიცებით, მათი პროექტით გათვალისწინებულია ორი მნიშვნელოვანი რამ - ადამიანის უფლებების დაცვა პირადი ცხოვრების ხელყოფისგან და სახელმწიფო უსაფრთხოება. ბესელია-ფოფხაძე-სესიაშვილის პაკეტის ფარგლებში ცვლილებები შედის "პერსონალურ მონაცემთა დაცვის შესახებ", "ოპერატიულ სამძებრო საქმიანობის შესახებ", "ელექტრონული კომუნიკაციების შესახებ", "სახელმწიფო საიდუმლოებების შესახებ" კანონებში და "სისხლის სამართლის საპროცესო კოდექსში".
ვახტანგ ხმალაძე კოლეგებს ცვლილებების მხოლოდ ორ - "ელექტრონული კომუნიკაციების შესახებ" კანონსა და "სისხლის სამართლის საპროცესო კოდექსში" სთავაზობს. ხმალაძე ე.წ. ერთგასაღებიანი სისტემის ამოქმედების წინადადებით გამოდის, რომელიც კომუნიკაციების ეროვნულ კომისიას გადაეცემა. კერძოდ, ხმალაძის პროექტის თანახმად, ფარულ მოსმენაზე სასამართლოს შესაბამისი განჩინება კომუნიკაციების კომისიაში მივა და სწორედ ეს ორგანო, ელექტრონული გასაღების მეშვეობით გახსნის კომპანიასა და შს სამინისტროს შორის დამაკავშირებელ არხს. ამასთან, პერსონალურ მონაცემთა დაცვის ინსპექტორს პროცესის კონტროლის ვალდებულება დაეკისრება.
მასალის გამოყენების პირობები