გიორგი მარგველაშვილმა მოსმენების შესახებ კანონპროექტს კვლავ ვეტო დაადო.
გიორგი მარგველაშვილმა საკუთარი გადაწყვეტილება საერთაშორისო პრინციპებით ახსნა. მისი თქმით, არ არის ბალანსი დაცული.
საქართველოს პრეზიდენტი ბესელია-ფოფხაძე-სესიაშვილის კანონს არ ეთანხმება. თუმცა, კანონის მიღების პროცესით კმაყოფილია, რადგან ეს პროცესი დემოკრატიულად წარიმართა.
პრეზიდენტმა პარლამენტს უკვე შესთავაზა კანონის ახალი პროექტი და ის დღის განმავლობაში საკანონდებლო ორგანოს გადაეგზავნება.
პრეზიდენტის ადმინისტრაციის მიერ მომზადებული კანონის პროექტის თანახმად, გასაღები კვლავ ორია. თუმცა, ერთი სასამართლოს, მეორე კი პერსონალური დაცვის ინსპექტორს გადაეცემა.
გიორგი მარგველაშვილი იმედს გამოთქვამს, რომ პარლამენტი მის კანონპროექტს მოიწონებს და მხარს დაუჭერს.
„კმაყოფილივარ იმ პროცესით, რომლითაც კანონის მიღება მოხდა. აქ იყო აქტიური ჩართულობა და ეს პროცესი იყო ქართული დემოკრატია. ყველა მხარე ცდილობდა, წვლილი შეეტანა ამ მოლაპარაკებების პროცესში. სამწუხაროდ, ვერ მივიღეთ სწორი ბალანსი დაცულობასა და ადამიანის უფლების დაცვას შორის. პარლამენტს ვთავაზობთ ახალ ვარიანტს, სადაც ფუქნციური გადანაწილება იქნება დაცული,“ - განაცხადა გიორგი მარგველაშვილმა.
მასალის გამოყენების პირობები