ეკონომიკის სამინისტროში უარყოფენ მედიაში გავრცელებულ ინფორმაციას მიმდინარე წლის 1 მარტიდან ავტომობილების სავალდებულო ტექდათვალიერების შემოღების შესახებ და აზუსტებენ, რომ აღნიშნული ინიციატივის განხორციელება ეკონომიკური საბჭოს რეკომენდაციის შედეგად მთავრობამ 2017 წლისთვის გადადო.
შეგახსენებთ, რომ გასული წლის აგვისტოში გავრცელებული ინფორმაციის თანახმად, მთავრობამ ავტომობილების სავალდებულო ტექნიკური დათვალიერების ვადა 2 წლით გადაწია და ეს გადაწყვეტილება მოსახლეობის სოციალურ–ეკონომიკური მდგომარეობით ახსნა.
როგორც გიორგი კვირიკაშვილმა მაშინ განაცხადა, საქართველოს მოსახლეობის დიდი ნაწილი საკმაოდ შეჭირვებულ მდგომარეობაშია და აქედან გამომდინარე, იმ სტანდარტებზე ერთბაშად გადასვლა, რომელიც ევროპაშია, ალბათ მოსახლეობისთვის მტკივნეული იქნებოდა.
ექსპერტ დავით მესხიშვილის თქმით, სავალდებულო ტექდათვალიერების შემოღების შედეგად მინიმუმ 300 000 ადამიანი ავტომობილის გარეშე დარჩებოდა.
თუმცა ეკონომიკის მინისტრის გიოგი კვირიკაშვილის განცხადებით, ტექდათვალიერების ორი წლით გადადება არ გულისხმობს იმას, რომ სამუშაო ახლავე არ დაიწყება. მისი შეფასებით, სახელმწიფომ და შესაბამისმა უწყებებმა უნდა შეიმუშაონ სტრატეგია, რათა გადავიდეთ იმ რეჟიმზე, რომ 2017 წელს მომზადებულები შევხვდეთ.
წყარო:კომერსანტი
მასალის გამოყენების პირობები