საფრანგეთის დედაქალაქ პარიზში, UNESCO-ს შტაბ-ბინაში, ქართველი პიანისტის ელისო ბოლქვაძისთვის ტიტულის - "UNESCO-ს ხელოვანი მშვიდობისთვის," მინიჭების ოფიციალური ცერემონია გაიმართება. ცერემონიაზე სტუმრებს სიტყვით UNESCO-ს გენერალური დირექტორი ირინა ბოკოვა, საფრანგეთის რესპუბლიკაში საქართველოს საგანგებო და სრულუფლებიანი ელჩი ეკატერინე სირაძე-დელონე, საქართველოს მუდმივი წარმომადგენელი UNESCO-ში და პიანისტი ელისო ბოლქვაძე მიმართავენ. ცერემონიას UNESCO-ს გენერალური დირექტორის მოადგილეები და სხვა ხელმძღვანელი პირები, პარიზში მცხოვრები ქართველი ხელოვანები და დიასპორის წარმომადგენლები დაესწრებიან. ღონისძიებაზე ასევე საფრანგეთში აკრედიტებული ელჩები და UNESCO-ში მუდმივი წარმომადგენლები არიან მიწვეულნი. საფრანგეთის რესპუბლიკაში ცერემონიის დასრულებისთანავე საქართველოს საელჩოს სახელით ოფიციალური მიღება გაიმართება. საქართველოს საგარეო საქმეთა სამინისტროს ინფორმაციით, ელისო ბოლქვაძისთვის ამ სტატუსის მინიჭების საფუძველი არა მხოლოდ მისი პროფესიონალიზმი, არამედ წლების განმავლობაში, მსოფლიოს სხვადასხვა კუთხეში გაწეული აქტიური საქველმოქმედო მოღვაწეობა, განსაკუთრებით კი ფონდ "ლირას" მეშვეობით ახალგაზრდა ნიჭიერი მუსიკოსების მხარდაჭერა გახდა. "UNESCO-ს ხელოვანები მშვიდობისთვის" კულტურის დარგში მოღვაწე გამოჩენილი ის პიროვნებები არიან, რომლებიც მზად არიან საკუთარი სახელი და სტატუსი ორგანიზაციის ღირებულებებისა და მთავარი მიზნების პოპულარიზაციისთვის უსასყიდლოდ გამოიყენონ.