27-დან 31 აგვისტოს ჩათვლით ქალაქ ბათუმში VI საერთაშორისო ფესტივალი “ღამის სერენადები” გაიმართება, რომლის უცვლელი ხელმძღვანელი მსოფლიოში აღიარებული  ქართველი მევიოლინე ლიანა ისაკაძეა.

ოთხი დღის განმავლობაში  ბათუმის საზაფხულო თეატრი ქართველი და უცხოელი მსმენელის სასურველ ადგილად გადაიქცევა. საღამოები 20 საათზე დაიწყება და მასზე დასასწრები ბილეთის ფასი 10 ლარი იქნება. წლევანდელ ფესტივალზე ტრადიციისამებრ თავს მოიყრიან  როგორც ქართველი, ისე უცხოელი ცნობილი მუსიკოს-შემსრულებლები. მათ შორის აღსანიშნავია  ლიტველი დირიჟორი გინტარას რინკევიჩუსი, სერგეი ნაკარიაკოვი, ვიოლონჩელისტი დენის შაპოვალოვი, აგრეთვე ვიოლონჩელისტი ალექსანდრ კნიაზევი, ფლეიტისტი იოსი არნჰეიმი, ამერიკელი პიანისტი სერგეი ბაბაიანი და ინგლისელი მევიოლინე იური ჟისლინი. სპეციალურად ამ ფესტივალისათვის ჩამოდიან უცხოეთში მოღვაწე ქართველი მუსიკოსებიც, კერძოდ: დირიჟორი ვახტანგ მაჭავარიანი, ალტისტი ოთარ მელიქიშვილი. ფესტივალში მონაწილეობას მიიღებენ ნიჭიერი ქართველი მოზარდები დათო წივწივაძე და სანდრო ნებიერიძე, რომლებიც უკვე მრავალი საერთაშორისო კონკურსის გამარჯვებულები არიან. რა თქმა უნდა, ფესტივალს დაამშვნებს შეუდარებელი ლიანა ისაკაძე და მის მიერ შექმნილი საერთაშორისო კამერული ორკესტრი “ვირტუოზები”.

ფესტივალის პროგრამა მეტად მრავალფეროვანია: 4 დღის განმავლობაში ბათუმის საზაფხულო თეატრში შესრულედება მოცარტის, ჰაიდნის, ჩაიკოვსკის, სენ-სანსის, შუბერტის, მენდელსონის, შოპენის, პროკოფიევის, რახმანინოვის, ბეთჰოვენის ნაწარმოებები. მათ შორის რამდენიმე ნაწარმოები თავად ლიანა ისაკაძის მიერ არის არანჟირებული.

ბათუმის ფესტივალის მონაწილეები თბილისსაც ესტუმრებიან, სადაც 3 სექტემბერს კონცერტს რუსთაველის თეატრში გამართავენ. თბილისური კონცერტი 20 საათზე დაიწყება და მასზე დასასწრები ბილეთის ფასი 20 ლარი იქნება.

ფესტივალის ორგანიზატორია საქართველოს კულტურის პალატა.

ფესტივალის მხარდამჭერია საქართველოს კულტურისა და ძეგლთა დაცვის სამინისტრო და ბათუმის მერია.