ქალაქ ზუგდიდის მუნიციპალიტეტის საკრებულოს დღევანდელ სხდომაზე  ზუგდიდში სწრაფი კვების ობიექტის „მაკდონალდსის“ მშენებლობასთან დაკავშირებით ისაუბრეს. საკრებულოს წევრმა „ნაციონალური მოძღაობიდან“ ბათლომე შელიამ აღნიშნულ საკითხზე თქვა, რომ ის მიესალმება ზუგდიდში მსოფლიო ბრენდის შემოსვლას, თუმცა აღნიშნა, რომ მისი განთავსება გუბერნიის შენობის გვერდით მსჯელობის საგანია. “თუ მთლიანად ათვისებული გვაქვს ქალაქი და სხვა საშუალება არ არის, მხოლოდ ამ შემთხვევაში შეიძლება ვიმსჯელოთ გუბერნიის გვერდით, თუმცა მგონი არსებობს ალტერნატივა, მაგალითად, იუსტიციის მიმდებარე ტერიტორიაზე“, - თქვა სხდომაზე ბათლომე შელიამ. ქალაქ ზუგდიდის საკრებულოს თავმჯდომარემ მერაბ ქვარაიამ სხდომაზე განაცხადა, რომ საკრებულოში „მაგდონალდსის“ მშენებლობასთან დაკავშირებით ჯერჯერობით არანაირი ოფიციალური დოკუმენტი არ შესულა. მისივე თქმით, „მაკდონალდსისთვის“ ფართის შეთავაზების  საკითხზე საკრებულოს შესაბამისი კომისიაც უნდა ჩაერთოს. „ჩვენი ხელისუფლების პოლიტიკა მიმართულია იქითკენ, რომ მცირე თუ მსხვილ ბიზნესს ჰქონდეს ხელშეწყობა, ეს ერთის მხრივ, თუმცა მეორეს მხრივ, ბუნებრივია თუ სად იქნება „მაკდონალდსი“ თუ სხვა რომელიმე დაწესებულება, აბსოლუტურად უნდა შეესაბამებოდეს ქალაქის ურბანულ განვითარებას. ადგილი უნდა შეირჩეს გონივრულად“- აცხადებს მერაბ ქვარაია. ქალაქ ზუგდიდის მერიამ, გუბერნიის შენობის გვერდით , „მაგდონალდის“ შესძლო მშენებლობასთან დაკავშირებით თავის ოფიციალურ ვებგვერდზე ინფორმაცია განათავსა სათაურით - გაგვიზიარეთ თქვენი მოსაზრებები! სოციალურ ქსელზე საკითხს დიდი გამოხმაურება მოჰყვა. საზოგადოების ნაწილი „მაგდონალდსის“ მშენებლობას დადებითად აფასებს, თუმცა მის განთავსებას გუბერნიის გვედით სკეპტიკურად უყურებს და მერიას ალტერნატიულ ფართებს სთავაზობს. არჩილ თოდუა: გუბერნიის შენობის გვერდზე „მაკდონალდსის“ აშენება არ მიმაჩნია კარგ იდეად - 1. გუბერნიის შენობა ერთ-ერთი ყველაზე დიდი ნაგებობაა ზუგდიდში და მის მიმდებარედ არსებული სივრცეც ამ შენობის შემადგენელი ნაწილია, შესაბამისად აქ მაკდონალდსის აშენება გუბერნიის შენობის მასშტაბებს და მიმდებარედ არსებული სივრცეს მოსპობს... ჩემი აზრით მაკდონალდსი უნდა აშენდეს 1. პროკრედიტ ბანკის გვერდზე (თუმცა სიღრმეში და არა გზის ნაპირას, ისე, რომ ავტომობილების მიმოსვლა არ შეფერხდეს) ან 2. თეატრის მოპირდაპირე მხარეს, დადიანის 4 ნომერში მდებარე კორპუსის გვერდზე, მისადგომიც ყველა მხრიდან ექნება ან 3. ცენტრისგან მოშორებით სადმე“. ალიკა გეთია: შესანიშნავი პროექტია, მივესალმები თუმცა ვიზიარებ Archil Todua-ს კომენტარს, გუბერნიის შენობასთან მე ვერ ვხედავ მის ადგილს, გაცილებით უკეთესია პროკრედიტის გვერდით ან "თი ბი სი" ბანკის გვერდით,ყოფილი პოლიციის შენობის ადგილას, თუ არგუმენტია რომ ეს ტერიტორიები კერძო საკუთრებაშია, ყველამ მშვენივრად იცის რა ხერხებით მოხდა მათი გასხვისება და ვის საკუთრებაშია ახლა ასე რომ ორი კარგი საქმის ერთდროულად გაკეთებაა შესაძლებელი!!!“ გიზო ჟვანია: პირველი შთაბეჭდილება თვალშისაცემია …გზის პირას ჩქაროსნულ ტრასაზე აშენებულ ბენზინგასამართ სადგურს გავს… კონსტრუქციით … დიზაინით … არქიტექტურული გადაწყვეტილებით სრულებით არ შეესაბამება მოედანს და მითუმეტეს გუბერნიის შენობის გვერდით გამოჩნდება როგორც "სარაია" … ზუგდიდის შუაგულში ტრადიციული მეგრულ-ლაზური კომპონენტებით და კუთხური ელემენტებით მორთულ - მოკაზმული თანამედროვე, ჰაეროვანი კონსტრუქციისგან აგებული შენობა უნდა დაიდგას, რომ არ დაამძიმოს და გადატვირთოს ისედაც უხეში გუბერნიის შენობა …“ ჯინა ეხვაია: ძალიან კარგია,ზუგდიდს მაგდონალდსი უნდა ქონდეს თავის თავად, ამ ქალაქს ხომ დიდი პოტენციალი გააჩნია.მაკეტიც მომწონს განასუკთრებით ღია ტერასა მეორე სართულზე.  რაც სეეხება ადგილს,  გუბერნიის მიმდებარე ტერიტორია მარკეტინგულადაც კარგია წარმატებები !“ - წერენ მოქალაეები სოციალურ ქსელზე. ქალაქ ზუგდიდის მერი ირაკლი გოგოხია აქცენტს დასაქმებაზე აკეთებს და აცხადებს, რომ "მაგდონალდსის" შემოსვლა სხვა ბრენდების შემსვლას შეუწყობს ხელს. მისივე თქმით, "მაგდონალდსის" მშენებლობაზე არსებული პროექტი საბოლოო არ არის და მასზე მუშაობა ჯერ კიდევ მიმდინარეობს. მისივე განმარტებით, ასევე არ არის მიღებული გადაწყვეტილება კომპანიას ფართი იჯარით გადაეცემა თუ პირდაპირი გზით მოხდება მიყიდვა. „ჩვენ სპეციალურად დავდეთ მერიის საიტზე პროექტი, რომ დაწყებულიყო საჯარი განხილვა, რადგან გადაწყვეტილებების მიღებაში მოქალაქეები აქტიურად უნდა იყვნენ ჩართულები. იდეას აზრთა სხვადასხვაობა მოჰყვა, თუმცა უფრო მეტი დადებითი ემოციები გამოიწვია. საზოგადოება მოხარულია, რომ შეიქმნება სამუშაო ადგილები და დასაქმდებიან ახალგაზრდები“, - აცხადებს ირაკლი გოგოახია. მერიის ინფორმაციით, ,,მაკდონალდსის" მაკეტი სპეციალურად ზუგდიდისთვის ავსტრიელმა არქიტექტორ-დიზაინერმა შლოფერმა შეიმუშავა.