2014 წლის 18 სექტემბერს სახალხო დამცველის აპარატმა დაბა მესტიაში ფრიდრიხ ებერტის ფონდის მხარდაჭერით და ზემო სვანეთის არასამთავრობო ორგანიზაციებთან პარტნიორობით გამართა კონფერენცია „ხუდონჰესი: ადამიანის უფლებების დაცვა და გადაწყვეტილების მიღების პროცესში მოქალაქეთა ჩართულობა“. კონფერენციაზე განიხილეს ხუდონჰესის მშენებლობის კანონიერების საკითხი, ადგილობრივ მაცხოვრებელთა უფლებრივი მდგომარეობა, მათ შორის საკუთრების და ჯანსაღ გარემოში ცხოვრების უფლება, კულტურული მემკვიდრეობის დაცვა-შენარჩუნების და განვითარების უფლება. ასევე განიხილეს ხუდონჰესის პროექტი ქვეყნის უსაფრთხოების ინტერესების ჭრილში და ამ პროცესში მოქალაქეთა მონაწილეობა და ჩართულობა გადაწყვეტილების მიღების დროს. კონფერენციაზე მოხსენებით გამოვიდნენ: სახალხო დამცველის აპარატის და არასამთავრობო ორგანიზაციების წარმომადგენლები, მოწვეული ექსპერტები. ღონისძიებას დაესწრნენ ადგილობრივი ხელისუფლების და საქართველოში აკრედიტირებული დიპლომატიური მისიების წარმომადგენლები. მიუხედავად მოწვევისა, კონფერენციაში მონაწილეობა არ მიუღიათ ენერგეტიკის, გარემოს დაცვისა და ბუნებრივი რესურსების სამინისტროს, რეგიონული განვითარებისა და ინფრასტრუქტურის სამინისტროს, ეკონომიკისა და მდგრადი განვითარების სამინისტროს მაღალი თანამდებობის პირებს. თუმცა, მათმა წარმომადგენლებმა საკუთარი უწყების პოზიციები დააფიქსირეს. კონფერენციას ენერგეტიკის სამინისტროს არცერთი წარმომადგენელი არ დასწრებია. შეხვედრაზე დეტალურად განიხილეს საქართველოს მთავრობასა და პროექტის განმახორციელებელ კომპანიას შორის დადებული ხელშეკრულების ნაკლოვანებები და საფრთხეები, რომლებიც სახელმწიფოს არასახარბიელო მდგომარეობაში აყენებს. ამასთან დღემდე არ არის დასაბუთებული პროექტის სახელმწიფოებრივი მნიშვნელობა და ქვეყნის ეკონომიური სარგებელი. მიუხედავად იმისა, რომ პროექტის განმახორციელებელ კომპანიას 2014 წლის 1 მარტამდე უნდა დაეწყო მშენებლობა, ამ დრომდე ჰესის მშენებლობისათვის საჭირო ვერცერთი ნებართვა ვერ მიიღო. გარემოს დაცვის და ბუნებრივი რესურსების სამინისტროს 111 შენიშვნის მიღების შემდეგ კომპანიას არ წარმოუდგენია გარემოზე ზემოქმედების შეფასების განახლებული ანგარიში. კიდევ ერთხელ აღინიშნა რომ შესაბამისმა უწყებებმა უნდა იმოქმედონ კანონის მოთხოვნათა სრული დაცვით და მიიღონ ყველა ზომა ადამიანის უფლებათა დარღვევის თავიდან ასაცილებლად. სახალხო დამცველის აპარატი აგრძელებს პროცესის მონიტორინგის და კიდევ ერთხელ მოუწოდებს საქართველოს მთავრობას სახალხო დამცველის 2014 წლის 13 მაისის რეკომენდაციის შესრულებისკენ.