ზუგდიდის მუნიციპალიტეტის საკრებულოს წევრი კახა მიქაია ადგილობრივი ხელისუფლების წარმომადგენლების პასუხისმგებლობის საკითხის დაყენებას ითხოვს. მიქაიას განმარტებით, მის მეგობარს  გიორგი სალიას, რომელიც ქალაქის მერიაშია დასაქმებული, მასთან მოგობრობას უკრძალავენ და ასევე,  აზრის გამოხატვის თავისუფლებას უზღუდავენ . ამის შესახებ კახა მიქაიამ დღეს გამართულ  საკრებულოს სხდომაზე ისაუბრა. „გიორგი სალიასთან ჯერ მიდის ზედამხედველობის სამსახურის უფროსი და ეუბნება: თუ შენ მიქაიასთან არ შეწყვეტ მეგობრობას, მისი ვიდეოების გაზიარებას და ფეისბუქზე მის სასარგებლო პოსტების დადებას, გაგათავიუფლებ სამსახურიდან, ჩვენ ერთად ვერ ვიმუშავებთო. ამის შემდეგ  გიორგიმ დაწერა განცხადება სამსახურიდან წასვლის შესახებ. რის შემდეგ, გიორგის იბარებს ქალაქის მერი ირაკლი გოგოხია და ეუბნება: შენ არ უნდა წახვიდე, რადგან ეს არ უნდა "გასაქმდეს" და მიქაიამ არ უნდა გააჟღეროს, მაგრამ შენ მიქაიასთან არ უნდა იმეგობრო. დღემდე ეს განცხადება არ არის დაკმაყოფილებული.  ბოლოს, სალიას იბარებს გამგებელი ედიშერ თოლორაია და ეუბნება იგივეს. გიორგი სალია ორშაბათს გავა სამსახურში და იმუშავებს, რადგან ჩვენ არ მივცემთ უფლებას არც მერს და არც ქალაქის საკრებულოს თავჯდომარეს, ვინმე მათი „ცოლის დაქალები“ ან „პორტირებული ნაციონალები“ დანიშნონ გიორგის ადგილზე“ , - განაცხადა კახა მიქაიამ. ამასთან, მიქაიამ  საკრებულოს დღევანდელ სხდომაზე რამდენიმე  საკითხზე ისაუბრა. მათ შორის, გუბერნიის გვერდით „მაკდონალდსის“ განთავსების შესახებ. მიქაიას თქმით, ის გუბერნიის გვერდით „მაკდონალდსის“ განთავსებას მხარს უჭერს. ასევე, მიქაია შინაგან საქმეთა სამინისტროსგან ითხოვს პასუხს, მუშაობს თუ არა ნამდვილად ზუგდიდის პოლიციის სამმართველოში ზაზა ხასაია, რომელიც მისივე თქმით, ყოფილი ხელისუფლების დროს   ოპოზიციის წარმომადგენლებს ებრძოდა და ჟურნალისტებს ფიზიკურ შეურაცხყოფას აყენებდა . „შინაგან საქმეთა სამინისტროსგან მივიღე პასუხი, რომ ხასაია არ მუშაობს მათ უწყებაში. ზუგდიდის პოლიციის სამმართველოს კადრების განყოფილებაში კი მითხრეს, რომ ხასაია ნამდვილად მუშაობს პოლიციაში. ვითხოვთ, თუ შეიძლება  გაგვარკვიეთ, მუშაობს თუ არა ეს ადამიანი შსს-ში?" - თქვა კახა მიქაიამ. ქალაქის მერიის ზედამხედველობის სამსახურის თანამშრომელმა და კახა მიქაიას მეგობარმა  გიორგი სალიამ, ჟურნალისტებთან საუბარში კახა მიქაიას სიტყვები დაადასტურა და აღნიშნა, რომ ის მიქაიას იმიტომ უჭერს მხარს, რომ ეს უკანასკნელი სიმართლეს ამბობს. ქალაქ ზუგდიდი მერმა ირაკლი გოგოხიამ,  რადიო „ათინათთან“ საუბარში კახა მიქაიას და გიორგი სალიას განცხადებებს სიცრუე უწოდა და აღნიშნა, რომ მას სალიასთვის მეგობრობა არავისთან დაუშლია. „გიორგი სალია ჩემი რეკომენდაციით დაინიშნა. გამგეობაში რიგით თანამშრომლად მუშაობდა და მე ქალაქის მერიაში დავაწინაურე, განყოფილების უფროსად დავნიშნე. როგორ შეიძლება ასე საუბარი? თუ რამე პრობლემა ჰქონდა, ჯერ მე უნდა ჩავეყენებინე საქმის კურსში. ცალსახად ვაფიქსირებ, რომ ასეთ რამეზე საუბარი არ გვქონია, ეს არის სიცრუე“, - განაცხადა ირაკლი გოგოხია. ზუგდიდის მუნიციპალიტეტის გამგებელი ედიშერ თოლორაია ადგილზე არ იმყოფება და ზემოაღნიშნულ საკითხზე გამგეობაში კომენტარი არ გაუკეთებიათ.