დღეს, ზუგდიდის საქალაქო სასამართლოში ვერა (ლალი) ანთიას ბრალდების,  ე.წ."წყლის მილების" საქმეზე, სასამართლო პროცესი გაიმართა. ანთიას წინააღმდეგ საქმე სისხლის სამართლის კოდექსის 177-ე მუხლითაა აღძრული, რაც ქურდობას გულისხმობს. ანთიას საგამოძიებო უწყება წყლის ავზების და მილების ამოღება-მითვისებას ედავება.  დღევანდელ სასამართლო პროცესზე ბრალდების 10-ზე მეტი მოწმე დაიკითხა. მათ შორის სატვირთო ავტომობილების მძღოლები და მილების გადამამუშავებელი კომპანიის წარმომადგენლები. სატვირთო ავტომობილის მძღოლები ლალი ანთიასთან კავშირს უარყოფენ და აცხადებენ, რომ ისინი განსასჯელს საერთოდ არ იცნობენ. მძღოლების თქმით, მათ მხოლოდ წყლის მილების დანიშნულების ადგილზე მიტანა ევალებოდათ. მითითებებს კი, ვინმე რამაზ ხოჭოლავა, იურა და გია აძლევდნენ. ამასთან, მძღოლები ამბობენ, რომ მათ წყლის მილები გაიტანეს სოფლებიდან: რუხი, ლია და რიყე. წყლის ავზები კი დარჩელიდან და ორულუდან. სატვირთო ავტომობილის მძღოლები წყლის მილების ზუგდიდის ტერიტორიიდან გატანის ზუსტ თარიღს ვერ იხსენებენ, თუმცა ფიქრობენ, რომ ეს იყო  2011-2012 წლები. ასევე, ერთ -ერთი მძღოლის ანზორ გოჩაშვილის თქმით, მან წყლის მილები ერთ-ერთი მშენებარე ტაძრიდან გაიტანა, რომელიც ზუგდიდის ცენტრთან ახლოს მდებარეობს. მისივე თქმით, ტაძრიდან მილების გატანას სასულიერო პირი ხელმძღვანელობდა, რომლის ვინაობა არ იცის. ვერა (ლალი) ანთიას ადვოკატის იოსებ ჯანაშიას თქმით, ანთია უდანაშაულოა და მას წყლის მილებთან კავშირი არ აქვს. მისივე განმარტებით, ანთიას ბრალდების საქმე რამაზ ხოჭოლავას ჩვენებაზეა აგებული, რომელიც ამჟამად ფსიქიატრიულ საავადმყოფოშია მოთავსებული. რაც შეეხება ლალი ანთიას  დღევანდელ პროცესს, ის ჯანმრთელობის გაუარესების გამო არ დასწრებია. ანთიას ზემოაღნიშნულ საქმეზე ზუგდიდის სასამართლომ წინასწარი პატიმრობა შეუფარდა. ცნობისთვის, ლალი ანთია სამართალდამცველებმა მიმდინარე წლის მარტში დააკავეს. შსს-ს მაშინდელი განცხადებით, ლალი ანთია თაღლითობის ბრალდებით იყო დაკავებული და მას გარკვეული პერიოდი სასჯელაღსრულების დაწესებულებაში გატარებული ჰქონდა, თუმცა ჯანმრთელობის მდგომარეობის გაუარესების გამო, სასჯელი გადაუვადდა.