დღეს, ზუგდიდში  სამოქალაქო მოძრაობის „სამაგრელოს ხმა“ ლიდერმა თენგიზ ჯგუშიამ საოლქო პროკურატურასთან ე.წ. „წყლის მილების“ საქმეზე ბრიფინგი გამართა. ჯგუშია „წყლის მილების“ საქმის ობიექტურ გამოძიებას ითხოვს და აცხადებს, რომ სამეგრელო-ზემო სვანეთის ოლქის პროკურორი გიზო უბილავა ზემოაღნიშნულ საქმეზე გუბერნატორ ლევან შონიას მფარველობს. „ლევან შონია სამმართველოს უფროსი იყო იმ დროს, როცა ეს მილები დაიტაცეს. ვინმე დაიჯერებს, რომ 3 კილომეტრი სიგრძის წყლის მილები სამმართველოს მონაწილეობის გარეშე მოიპარეს?! შონია რომ არ იქნეს მხილებული ამ საქმეში, პროკურორი უბილავა ცდილობს ამ საქმის მიჩქმალვას და ეს არის ერთობლივი დანაშაული“, - ამბობს თენგიზ ჯგუშია. ამასთან, ჯგუშიას თქმით,  პროკურატურა ცდილობს „წყლის მილების“ საქმე რამდენიმე ახალგაზრდას, რომლებიც აღნიშნულ დანაშაულზე არიან ბრალდებულები,  „მიახოცოს“  და ამით რეალური დამნაშაავები იხსნას. „ლაპარაკია ამწის მძღოლზე, დემონტაჟის გამკეთებელზე და ახალგაზრდა ინჟინერზე, რომლებიც დღეს ციხეში არიან, მაგრამ მე მათიც მიკვირს, რატომ არ ადებენ  ხელს დანაშაულის უშუალო დამკვეთებს. რაღაცა ხდება... აქციები გაგრძელდება საქართველოს პარლამენტთან, პრემიერ-მინისტრის რეზიდენციასთან“, - თქვა თენგიზ ჯგუშიამ. მისივე თქმით, მან დღეს ბრიფინგი  შეგნებულად გამართა, რადგან რამდენიმე დღეში პროკურატურა მის დაკავებას გეგმავს. „პროკურორი უბილავა ცდილობს ოთხ დღეში ციხეში გამიშას, იმის გამო, რომ დღევანდელი საკრებულოს თავმჯდომარეს, მერაბ  ქვარაიას არ ვაპატიე ჩემი მამაკაცური ღირსების შელახვა და სილა გავაწანი. ქვარაიასთვის სილის გაწნის გამო მე მიშვებს უბილავა ციხეში, რომ ეს ბერკეტად გამოიყენონ და სასმელი წყლის ამბავზე გავჩუმდე “ - აცხადებს ჯგუშია. თენგიზ ჯგუშიას მიერ საოლქო პროკურატურასთან გამართულ ბრიფინგს რიყის რამდენიმე მკვიდრიც ესწრებოდა. მათი თქმით, ისინი სასმელი წყლის მილების დაბრუნებას და საქმის გამოძიებას ითხოვენ. ჯგუშიას ბრალდებებს სამეგრელო-ზემო სვანეთის საოლქო პროკურატურში და გუბერნიის ადმინისტრაციაში არ უპასუხეს. ცნობისთვის, სოფელ რიყიდან სასმელი წყლის 3 კმ-მდე სიგრძის მილი, გასული წლის დეკემბერში თვითნებურად ამოიღეს. დანაშაულზე რამდენიმე პირია დაკავებული.