დღეს, 12:00 საათზე, მინისტრი მიხეილ გიორგაძე ფოთს ეწვევა. მიხეილ გიორგაძე ვალერიან გუნიას სახელობის სახელმწიფო თეატრში სამეგრელო-ზემო სვანეთის რეგიონის (წალენჯიხა, ჩხოროწუ, აბაშა, სენაკი, ფოთი) ფოლკლორულ ანსამბლებსა და სამუსიკო სკოლებს სხვადასხვა სახეობის 50-მდე მუსიკალურ ინსტრუმენტს გადასცემს. მინისტრთან ერთად სამეგრელოს ფოლკლორის სახელმწიფო ცენტრის აღმასრულებელი დირექტორი გიორგი დონაძეც ესტუმრება. მიხეილ გიორგაძე და ფოლკლორის ცენტრის დირექტორი საზოგადოებას ერთობლივ სამომავლო გეგმებს გააცნობენ. მინისტრი ვალერიან გუნიას სახელობის სახელმწიფო თეატრის დასსაც შეხვდება. სამინისტროს ინფორმაციით, დღევე, 15:30 საათზე, კულტურისა და ძეგლთა დაცვის მინისტრი კულტურული მემკვიდრეობის დაცვის ეროვნული სააგენტოს დირექტორთან, ნიკოლოზ ანთიძესთან ერთად უშუალოდ მოინახულებს ძეგლთა დაცვის სფეროში ერთ-ერთ ყველაზე რთულ მდგომარეობაში მყოფი ძეგლის - სქურის სარეაბილიტაციო სამუშაოებს. 16:30 საათზე, მინისტრი ზუგდიდში შალვა დადიანის სახელობის სახელმწიფო დრამატულ თეატრს ეწვევა და დასის წევრებს შეხვდება. 17:00 საათზე, ზუგდიდში, კულტურის ცენტრში - "ოდიში", მიხეილ გიორგაძე ცნობილი ქართველი ლოტბარისა და მომღერლის, პოლიკარპე ხუბულავას საიუბილეო საღამოს დაესწრება. ღონისძიებაში მონაწილეობას მიიღებენ სხვადასხვა რეგიონის ადგილობრივი ფოლკლორული ანსამბლები. საღამოს დასასრულს, კულტურის ცენტრის წინ ქართველი ლოტბარის, პოლიკარპე ხუბულავას ვარსკვლავი გაიხსნება.