ზუგდიდის ბაზრის მოვაჭრეებს შპს „სუპერმარკეტის“ ადმინისტრაციამ გადასახადი გაუძვირა. მოვაჭრეების თქმით, მათ იანვრიდან თვეში დამატებით 30 ლარის გადახდა მოუწევთ. ისინი გაზრდილი გადასახადის გამო უკმაყოფილობას გამოთქვამენ და შიშობენ, რომ ქირის გადახდა გაუჭირდებათ. მოვაჭრეები გადასახადს სავაჭრო ფართის მიხედვით იხდიან. „ვაჭრობა ისედაც არ იყო. ახლა ქირა გაგვიძვირეს და არ ვიცით როგორ მოვახერხებთ მის გადახდას. აქ ყველას სესხი აქვს, ყველას გვიჭირს“, - ამბობენ მოვაჭრეები. შპს „სუპერმარკეტის“ ადმინისტრაციის ხელმძღვანილი გია კანკია გადასახადის გაძვირებას ადასტურებს. მისი თქმით, შპს რამდენიმე პარტნიორმა დატოვა, რის გამოც მათ შემოსავლები შეუმცირდათ. გარდა ამისა, კანკია გადასახადების გაზრდის მიზეზად ბაზრის, სამომავლოდ დაგეგმილ, კეთილმოწყობას ასახელებს. „ჩვენგან წავიდნენ პარტნიორები, მათ სავაჭრო ფართები კერძო საკუთრებაში დაიკანონეს. აწი მათ გადასახდელების გადახდა არ მოუწევთ და აქედან გამომდინარე ჩვენ შემოსავლები შეგვიმცირდა. ასევე, ბაზარში მოსაწესრიგებელია კანალიზაცია, ბევრი პრობლემაა... აქედან გამომდინარე, იძულებულები გავხდით გადასახადი გაგვეზარდა“, -თქვა გია კანკიამ. მოვაჭრეებისთვის გადასახადის გაზრდის პარალელურად, ზუგდიდის თვითმმართველობა სახელმწიფოს ბალანსზე არსებული მიწის დაკანონებაზე მუშოაბს. ასეთია შპს „სუპერმარკეტის“ მიმდებარედ არსებული 545კვ.მ მიწის ფართი, სადაც მოვაჭრეების დიდი ნაწილი მუშაობს. ადგილობრივი ხელისუფლების წარმომადგენლების განმარტებით, მათი მიზანია სახელმწიფოს ბალანსზე არსებული ქონების დაკანონება ქალაქის საკუთრებაში, რათა შემოსავლები არა ცენტრალურ, არამედ ადგილობრივ ბიუჯეტში შევიდეს. „ ამ საკითხზე მუშაობა დავიწყეთ. ველოდებით პასუხს. დიდი ალბათობით, სახელმწიფო მის მფლობელობაში არსებულ ქონებას ადგილობრივ თვითმმართველობას გადასცემს. რაც შეეხება შპს „სუპერმარკეტის“ ტერიტორიაზე არსებულ ფართს, იმ შემთხვევაში, თუ ის ქალაქს საკუთრებაში გადაეცემა, მოვაჭრეებს მდგომარეობა შეუმსუბუქდებათ“,- აღნიშნა ქალაქ ზუგდიდის საკრებულოს ეკონომიკისა და ქონების მართვის საკითხთა კომისიის თავმჯდომარე თენგიზ ქოჩუამ.